«Քաղաքացիական պայմանագիր» խմբակցության պատգամավորներն առաջարկել են համապետական ընտրություններին և հանրաքվեներին մասնակցելու համար նստակեցության ցենզ սահմանել։ Ըստ օրենքի նախագծի՝ ձայնի իրավունքը կպահպանեն ՀՀ քաղաքացիություն ունեցող միայն այն անձինք, որոնք ընտրություններին նախորդած մեկ տարվա ընթացքում առնվազն 6 ամիս բնակվել են ՀՀ-ում։
Նախաձեռնության հեղինակները պնդում են, որ ներկայիս կարգավորումներով Ազգային ժողովի ընտրություններին և հանրաքվեներին մասնակցելու ժամանակ հաշվի չի առնվում քաղաքացի-պետություն մշտական կայուն կապի առկայությունը (բացակայում է քաղաքացի-պետություն մշտական կապն արտացոլող որևէ լուծում)։ Ընդ որում, համանման պահանջ արդեն իսկ գործում է տեղական ինքնակառավարման մարմինների ընտրությունների և տեղական հանրաքվեների ժամանակ։
Նախագծում նաև նշվում է, որ ընտրություններին և հանրաքվեներին մասնակցությունն օբյեկտիվորեն առավել արդարացված կարող է լինել այն քաղաքացիների համար, ում համար Հայաստանը հանդես է գալիս որպես հիմնական շահերի կենտրոն, և որոնք ստանձնում են ընտրված իշխանության որոշումների (գործունեության) հետևանքները կրելու պատրաստակամություն։
Նախագծի հիմնավորման մեջ ասվում է, որ քաղաքացիությունը չի կարող դիտարկվել (լինել) միայն ֆորմալ իրավական կապ պետության հետ, այլ պետք է արտացոլի իրական սոցիալական, տնտեսական և կենսագործունեության կապ պետության հետ։
Պատգամավորների կարծիքով՝ ընտրությունների արդյունքները պետք է արտացոլեն այն անձանց կամքը, որոնք իրապես գտնվում են պետության որոշումների ազդեցության տիրույթում։ Նախաձեռնության հեղինակները գտնում են, որ երկրից անձի տևական բացակայությունը կարող է վկայել այն մասին, որ անձը տևական ժամանակ կտրված է Հայաստանի քաղաքական, սոցիալական, տնտեսական կյանքից։
