Ազգային ժողովի պետա-իրավական հարցերի մշտական հանձնաժողովը 3 կողմ, 6 դեմ և 0 ձեռնպահ ձայներով բացասական եզրակացություն տվեց «Պատիվ ունեմ» խմբակցության՝ «Ազգային ճգնաժամի և կառավարման ձախողման մասին» հայտարարության նախագծին։
Նախագծին դեմ քվեարկեց ԱԺ «Քաղաքացիական պայմանագիր» խմբակցությունը, իսկ հանձնաժողովի նախագահ, ՔՊ պատգամավոր Վլադիմիր Վարդանյանն առաջարկել էր հայտարարությունն անվանել «ընդդիմության ճգնաժամ և ընդդիմության գործունեության ձախողում»։
«Սա շատ լավ նախընտրական ծրագիր է, գնացեք ու դրանով առաջնորդվեք, բայց խորհուրդ չէի տա։ Ինչո՞ւ, որովհետև դուք երազելի ընդդիմություն եք, քանի որ 4 տարիներին Լեռնային Ղարաբաղի խնդիրներից զատ որևէ այլ բովանդակային խնդրի մասին չեք բարձրաձայնել»,- իր խոսքն ուղղելով ընդդիմադիրներին՝ ասաց Հովհաննիսյանը։
Նախագիծը ներկայացնելիս ընդդիմադիր «Պատիվ ունեմ» խմբակցության ղեկավար Հայկ Մամիջանյանը նշեց, որ առաձնապես սպասելիքներ չունի, որ ՔՊ-ն կողմ կքվեարկի։
«Վերնագրի փոփոխության հետ կապված ձեր առաջարկը չի ընդունվում»,- Հովհաննիսյանին պատասխանեց Մամիջանյանը։
Վերջինիս դիտարկմամբ՝ հայտարարությանը երկու կարևոր կետ կարելի էր ավելացնել։
««Արտաքին քաղաքականություն, արկածախնդրություն և զիջում» բաժնում կարելի էր ավելի մանրամասն ներկայացնել այն անորոշությունները, որոնք առաջացել են Վաշինգտոնում կնքված փաստաթղթերի առնչությամբ՝ հատկապես {ՀՀ վարչապետ-AT} Նիկոլ Փաշինյանի վերջին ելույթների համատեքստում»,- ասաց Մամիջանյանը։
Նրա խոսքով՝ «Նահանջ ժողովրդավարությունից և մարդու իրավունքների համատարած խախտումներ» հատվածում կավելացնեին Շիրակի թեմի առաջնորդ Միքայել արքեպիսկոպոս Աջապահյանին 2 տարով ազատազրկելու որոշումը, որը, պատգամավորի բնորոշմամբ, «խայտառակություն է և կրկին ընդգծում է ժողովրդավարության հետնահանջը երկրում»։
Հասարակական գործիչներ Նարեկ Մալյանն ու Էդգար Ղազարյանը վարչապետին անվստահություն հայտնելու կոչով ապրիլին դիմել էին խորհրդարանի պատգամավորներին: «Պատիվ ունեմ» խմբակցությունն աջակցել էր նախաձեռնությանը և առաջադրել Մասիսի քաղաքապետ Դավիթ Համբարձումյանի թեկնածությունը։ «Հայաստան» խմբակցությունը կասկածի տակ էր դրել նախաձեռնության հեղինակների անկեղծությունն ու Փաշինյանին հեռացնելու համար փողոցային ճնշումների կոչ էր արել: Սեպտեմբերի 26-ի ԱԺ լսումներին «Հայաստան» խմբակցությունը հայտարարել էր իմփիչմենթի գործընթացին միանալու մասին։
