Թուրքիայի նախագահ Ռեջեփ Թայիփ Էրդողանը Հայոց ցեղասպանության 110-րդ տարելիցի կապակցությամբ ուղերձ է հղել Թուրքիայի հայ համայնքին: Սակայն նա կրկին խուսափել է «Ցեղասպանություն» եզրույթը հիշատակել և հրաժարվել է զանգվածային սպանությունների պատասխանատվությունը դնել Օսմանյան կայսրության իշխանությունների վրա։
Էրդողանն ուղերձում հայերի «զանգվածային սպանությունն» այդ տարիներին բացատրել է «ապստամբություններով, ավազակախմբերի գործողություններով, համաճարակներով և պատերազմական տարիների այլ ողբերգություններով»։ Թուրքիայի առաջնորդը կոչ է արել «չդառնալ անցյալի պատանդը և համատեղ կառուցել ապագան»:
Էրդողանը ցավակցություն է հայտնել զոհվածների ժառանգներին՝ նշելով, որ Թուրքիան շարունակում է «կիսել ուրախություններն ու վիշտն» իր բոլոր քաղաքացիների, այդ թվում՝ հայ համայնքի հետ:
«Մեր երկրի մշակույթի, արվեստի, քաղաքականության, տնտեսության, կրթության և հասարակական կյանքում արժեքավոր ներդրում ունեցած Հայաստանի մեր քաղաքացիների խաղաղությունը, անվտանգությունն ու բարեկեցությունը շարունակելու են մնալ մեր առաջնահերթությունը»,- նշել է Էրդողանը։
«Կիսում եմ հայ համայնքի անցյալի տառապանքները և կրկին հարգանքով եմ հիշում օսմանահայերին, ովքեր զոհվել են»,- հայտարարել է նա։
Թուրքիայի նախագահի խոսքով՝ «պատմությունից թշնամանք ստեղծելու, հայ համայնքի և թուրքերի վաղեմի և ամուր կապերը խարխլելու փորձերը վերջնարդյունք չեն ունեցել»։
Ապրիլի 24-ին լրանում է Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 110-րդ տարելիցը։ Աշխարհասփյուռ հայությունը ոգեկոչման միջոցառումներով կհիշի 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 110 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։ Մարտին Հայաստանի վարչապետ Նիկոլ Փաշինյանը թուրքական լրատվամիջոցներին տված հարցազրույցում հայտարարել էր, որ Հայոց ցեղասպանության միջազգային ճանաչումը պաշտոնական Երևանի արտաքին քաղաքական առաջնահերթություններից չէ։
