Սյունիքի մի շարք գյուղերի բնակիչներ զրկված են արոտավայրերից և վարելահողերից․ Թաթոյան

Սյունիքի մարզի Տեղ, Խնածախ, Խոզնավար, Արավուս, Ներքին Հանդ, Ճակատեն և այլ գյուղերի բնակիչները զրկված են արոտավայրերից, վարելահողերից, խոտհարքներից, բերքատու այգիներից, քանի որ դրանց մեծ մասը հայտնվել է ադրբեջանական վերահսկողության կամ թիրախի ներքո, հայտնում է «Թաթոյան» հիմնադրամը։

Կազմակերպության իրավական թիմն ապրիլի 12-ին և 13-ին փաստահավաք աշխատանքներ է իրականացրել Սյունիքի մարզի մի շարք սահմանամերձ բնակավայրերում: Այցը նպատակ ուներ նախապատրաստել միջազգային կառույցներ, այդ թվում` միջազգային դատական ատյաններ ներկայացնելու ենթակա կոնկրետ դիմումներ:

Մասնագետները նշել են, որ գրեթե վերացել կամ խիստ նվազել է անասնապահությունը և խոզաբուծությունը, իսկ նախկինում եկամտի հիմնական աղբյուր հանդիսացող այգիները դարձել են թե՛ անհասանելի, թե՛ մարդկանց կյանքի համար վտանգավոր (օրինակ` Տեղ, Արավուս, Ներքին Հանդ և այլն)։

Հիմնադրամի տվյալներով՝ վերջին շրջանում` ամեն գիշեր, որպես կանոն, ժամը 22:30-ից մինչև առավոտյան 6:30-ի սահմաններն ադրբեջանական զինված ուժերն անկանոն կրակահերթեր են արձակում հայկական բնակավայրերի ուղղությամբ:

Այցից անմիջապես առաջ կրակոցներից մեկի ժամանակ Խնածախում վնասվել են բնակիչներից մեկի տան տանիքին տեղադրված ջրատաքացման համար նախատեսված արևային վահանակները:

Ապրիլ ամսվա ընթացքում ադրբեջանական զինուժը երկու անգամ կրակել էր Սյունիքի մարզի Խնածախ գյուղի ուղղությամբ։ Մարտի 31-ին Ադրբեջանի ԶՈւ-ն կրակ էր բացել Խնածախի ուղղությամբ, ինչի հետևանքով վնասվել էր բնակելի տուն։ ՔԿ-ն քրվարույթ էր հարուցել ադրբեջանական զինուժի կրակոցներից հետո։ Ապրիլի 20-ին Ադրբեջանի ԶՈւ կրակոցների հետևանքով վնասվել էր գյուղի բնակելի տներից մեկի տանիքում տեղադրված արևային ջրատաքացուցիչը։