Ռուսաստանը հայտարարել է, որ Հայաստանին է ներկայացրել «Հարավկովկասյան երկաթուղի» ընկերության կոնցեսիայի շուրջ բոլոր պարզաբանումները՝ միաժամանակ ընդգծելով, որ Մոսկվան շարունակում է մնալ Հայաստանի անվտանգության և տնտեսության հիմնական հենասյունը։
ՌԴ ԱԳՆ ԱՊՀ երկրների չորրորդ վարչության տնօրեն Միխայիլ Կալուգինը ՏԱՍՍ-ին տված հարցազրույցում հայտարարել է, որ «Հարավկովկասյան երկաթուղի» (ՀԿԵ) ընկերության կոնցեսիայի թեման մանրամասն քննարկվել է ապրիլի 1-ին Ռուսաստանի և Հայաստանի ղեկավարների բանակցությունների ընթացքում։
Կալուգինը նշել է, որ Եվրամիությունը Երևանին չի առաջարկում անվտանգության «շոշափելի այլընտրանք», մինչդեռ ռուսական կողմը տարիներ շարունակ ներդրումներ է իրականացրել հայկական երկաթուղիներում, ապահովել աշխատատեղեր և պահպանել երկրի էներգետիկ ու պարենային անվտանգությունը։
Նրա խոսքով՝ ռուսական կողմը հայկական իշխանություններին պարզաբանել է կոնցեսիայի շուրջ բոլոր մտահոգիչ հարցերը, ինչպես նաև ձեռք է բերվել փոխըմբռնում հետագա աշխատանքի ձևաչափերի վերաբերյալ, այդ թվում՝ տարածաշրջանային հաղորդակցությունների ապաշրջափակման համատեքստում։
Կալուգինը նշել է, որ Մոսկվայում արձանագրել են վարչապետ Նիկոլ Փաշինյանի հայտարարությունը, ըստ որի՝ Երևանը չի պատրաստվում կոնցեսիայի հետ կապված հարցերը քննարկել «Ռուսաստանի թիկունքում»։
Ռուս դիվանագետը նաև մերժել է այն պնդումները, թե ռուսական կառավարման պայմաններում հայկական երկաթուղիները կորցնում են մրցակցային առավելությունները։ Ըստ նրա՝ հակառակը՝ ռուսական մասնակցությունն է հնարավորություն տվել պահպանել և վերականգնել երկաթուղային ցանցը, ինչը կարևոր է Հարավային Կովկասի տրանսպորտային հաղորդուղիների հնարավոր «վերագործարկման» պայմաններում։
Կալուգինի տվյալներով՝ 2008 թվականից ռուսական կողմը հայկական երկաթուղիներում ներդրել է շուրջ 30 մլրդ ռուբլի, ևս մոտ 15 մլրդ ռուբլի վճարվել է Հայաստանի բյուջե։ Նա հստակեցրել է, որ ներդրումների մի մասն ուղղվել է շարժակազմի արդիականացմանը, այդ թվում՝ Երևան-Գյումրի երթուղու նոր գնացքների գործարկմանը։ Նա ընդգծել է, որ ՀԿԵ-ն շարունակում է մնալ Հայաստանի խոշոր գործատուներից մեկը՝ ապահովելով շուրջ 2500 աշխատատեղ։
Հարցազրույցում Կալուգինն անդրադարձել է նաև հայ-ռուսական անվտանգային համագործակցությանը՝ հայտարարելով, որ Ռուսաստանն ու Հայաստանը կապված են մի շարք պայմանագրերով, որոնք շարունակում են ապահովել հանրապետության անվտանգությունը։
Նա նշել է, որ ՀԱՊԿ-ը շարունակում է մնալ տարածաշրջանային անվտանգության կարևոր բաղադրիչ, և Հայաստանի կողմից անդամակցության «սառեցումը» չի փոխում պարտավորությունների էությունը։ Կալուգինի խոսքով՝ Եվրամիությունը Երևանին որևէ իրական անվտանգային այլընտրանք չի առաջարկում։
Ռուս դիվանագետը հիշեցրել է նաև 1992 թվականի պայմանագրերը՝ Թուրքիայի և Իրանի հետ սահմանների պահպանության վերաբերյալ, 1995 թվականի ռուսական ռազմաբազայի տեղակայման մասին համաձայնագիրը, ինչպես նաև 1997 թվականի բարեկամության, համագործակցության և փոխադարձ օգնության պայմանագիրը։
Տնտեսական համագործակցության մասին խոսելիս Կալուգինը նշել է, որ 2025 թվականի տվյալներով՝ Հայաստանի արտաքին առևտրաշրջանառության 36% բաժին է ընկել Ռուսաստանին, մինչդեռ Եվրամիության մասնաբաժինը կազմել է մոտ 10%։ Նրա խոսքով՝ հայկական գյուղատնտեսական արտադրանքի 98%-ը և թունդ ալկոհոլային խմիչքների արտահանման 78%-ը մատակարարվում է ռուսական շուկա։
Կալուգինը հավելել է, որ Հայաստանում ռուսական ներդրումների կուտակային ծավալը հասել է 4,2 մլրդ դոլարի։ Նրա խոսքով՝ Ռուսաստանը շարունակում է մնալ Հայաստանի էներգետիկ և պարենային անվտանգության գլխավոր երաշխավորներից մեկը։
Միաժամանակ, ռուս դիվանագետը հայտարարել է, որ Ռուսաստանի շահերը Հարավային Կովկասում «անսասան են», և Արևմուտքը, «չնայած գեղեցիկ խոսքերին», չի կարող փոխարինել Մոսկվային տարածաշրջանում՝ ո՛չ անվտանգության, ո՛չ էլ տնտեսության ոլորտներում։
Փետրվարին Փաշինյանը հայտնել էր, որ Հայաստանի իշխանությունները քննարկում են երկաթուղու կոնցեսիոն կառավարումը Երևանին և Մոսկվային բարեկամ երրորդ երկրի հանձնելու հնարավորությունը: Հնարավոր տարբերակների շարքում նա նշել էր Ղազախստանը, ԱՄԷ-ն և Կատարը:
Կարդացեք նաև՝
