«Հարավկովկասյան երկաթուղի» ընկերությունն ապրիլի 1-ից 10%-ից մինչև 15%-ի չափով բարձրացրել է աշխատակիցների աշխատավարձերը, ասված է ընկերության հաղորդագրության մեջ:
Ըստ այդմ՝ աշխատավարձերի վերանայումն իրականացվել է տարբերակված մոտեցմամբ. արտադրական անձնակազմի համար աճը կազմել է 15%, իսկ ինժեներատեխնիկական և ղեկավար կազմի համար (բացառությամբ բարձրագույն ղեկավարության)՝ 10%։
Ընկերությունից հայտնել են, որ աշխատավարձերի վերանայումը կրում է համակարգային բնույթ և ամրագրված է կոլեկտիվ պայմանագրով։ Ինդեքսացիայի մեխանիզմն անմիջականորեն կապված է ՀՀ կառավարության կողմից կանխատեսվող սպառողական գների ինդեքսի և մակրոտնտեսական ցուցանիշների հետ։ Նշվել է, որ 2023-2025 թվականների ընթացքում ընդհանուր ինդեքսացիայի մակարդակը կազմել է 11%, սակայն այս տարի որոշում է կայացվել իրականացնել ավելի բարձր՝ մինչև 15% աճ առանցքային մասնագիտությունների համար։
ՀԿԵ-ից հայտնել են նաև, որ շարունակում են վարել ակտիվ սոցիալական քաղաքականություն։ Ըստ ընկերության տվյալների՝ ամեն տարի արհմիութենական կազմակերպությունների միջոցով շուրջ 250 միլիոն դրամ է ուղղվում աշխատակիցների սոցիալական աջակցությանը։
Հունվարից քննարկումներ են սկսվել հայկական երկաթուղու կոնցեսիոն կառավարման շուրջ։ Վարչապետ Նիկոլ Փաշինյանը ռուս գործընկերներին կոչ էր արել արագացնել Թուրքիայի և Ադրբեջանի հետ սահմաններ տանող երկաթուղային հատվածների վերականգնումը՝ «Թրամփի միջազգային խաղաղության և բարգավաճման երթուղի» (TRIPP) տրանսպորտային նախաձեռնության իրականացման համատեքստում:
Փետրվարին Փաշինյանը հայտնել էր, որ իշխանությունները քննարկում են երկաթուղու կոնցեսիոն կառավարումը Երևանին և Մոսկվային բարեկամ երրորդ երկրի հանձնելու հնարավորությունը: Հնարավոր տարբերակների շարքում նա նշել էր Ղազախստանը, ԱՄԷ-ն և Կատարը:
Այս հայտարարությանը հաջորդել էին ռուսական կողմի արձագանքները. ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ Մոսկվան բանակցություններ չի վարում «Հարավկովկասյան» երկաթուղու կառավարման կոնցեսիան Ղազախստանին հանձնելու վերաբերյալ։ Ավելի ուշ ՌԴ փոխվարչապետ Ալեքսեյ Օվերչուկն զգուշացրել էր, որ երկաթուղիների կոնցեսիայի վաճառքը կարող է զրկել Հայաստանին ռուսական բեռներից։
Ղազախական կողմը ևս հայտարարել էր, որ չի բանակցում հայկական երկաթուղիների ռուսական կոնցեսիայի ձեռքբերման շուրջ։
ՀՀ փոխվարչապետ Մհեր Գրիգորյանն ապրիլի 15-ին հայտարարել էր, որ հայկական կողմը փորձում է լուծում տալ երկրի երկաթուղային համակարգի կոնցեսիոն կառավարման վերահասցեագրման հարցին։
