Վարչապետ Նիկոլ Փաշինյանի ավտոշարասյան կողմից վրաերթի ենթարկված Սոնա Մնացականյանի մահվան տարելիցի կապակցությամբ ապրիլի 27-ին Երևանի Պարոնյան և Լեո փողոցների խաչմերուկում տեղի է ունեցել հիշատակի միջոցառում։
Մասնակիցները ծաղիկներ և պաստառներ են բերել՝ «Նիկո՛լ, ոտքդ գազից հանիր, մարդ չմեռնի էլ» և «Պահանջում ենք նվազեցնել մահացու ավտոշարասյուների արագությունը»։
Հանրային ռադիոյի նախկին փոխտնօրեն Լիկա Թումանյանը նշել է, որ Մնացականյանի մահը «չդարձավ ուղղակի հերթական վիճակագրական թիվ»։ Նա նշել է, որ քաղաքացիները մի քանի տարի շարունակ պարբերաբար հավաքվում են վթարի վայրում՝ պահանջելով արդարադատություն։
Թումանյանը նաև ասել է, որ դատավարությունը ձգձգվում է, և վաղեմության ժամկետը լրանում է 2027 թվականին։ Նրա խոսքով՝ Փաշինյանի ավտոշարասյան վարորդ Արամ Նավասարդյանը, որը վրաերթի էր ենթարկել Մնացականյանին, կարող է ազատ արձակվել վաղեմության ժամկետի լրանալու պատճառով։
Նա հավելել է, որ վարորդը չի ազատվել աշխատանքից և ամբողջ դատավարության ընթացքում մնացել է ազատության մեջ։
Մնացականյանի մահվան տարելիցի կապակցությամբ այսօր հրավիրված «Քաղաքացին և արդարադատությունը» խորագրով ասուլիսի ժամանակ իրավաբաններն ու տեղեկատվական ոլորտի փորձագետները ներկայացրել են վարչապետի ավտոշարասյան մասնակցությամբ տեղի ունեցած ողբերգական վթարի նոր մանրամասները։
Ըստ փաստաբան Տաթիկ Սողոյանի՝ վրաերթից հետո ավտոշարասյունը կանգ չի առել տուժող Սոնա Մնացականյանին օգնություն ցուցաբերելու համար և շարունակել է ընթացքը նույն արագությամբ։ Բանախոսը նշել է, որ Փաշինյանն այդ պահին մեկնում էր «Քաղաքացիական պայմանագիր» խմբակցության պատգամավորների հետ աշխատանքային հանդիպման, ինչը պետական նշանակության անհետաձգելի միջոցառում չէր։
Սողոյանը նաև հայտնել է, որ պատճառներից մեկն էլ խաչմերուկի ոչ պատշաճ արգելափակումն էր, ինչի հետևանքով տարածքում կային այլ մեքենաներ և հետիոտներ։ Նա հավելել է, որ ըստ փաստական տվյալների՝ վարչապետի կողմից օգնություն կանչելու վերաբերյալ թեզերը չեն հաստատվել, իսկ տուժողին օգնել է պատահաբար տարածքով անցնող «Շտապօգնության» մեքենան։
Փորձագետ Կարեն Վրթանեսյանն, իր հերթին, պնդել է, որ իշխանությունները փորձել են սահմանափակել տեղեկատվության տարածումը։ Ըստ նրա՝ ոստիկանության առաջին հաղորդագրություններում որևէ խոսք չկար ավտոշարասյան մասին, իսկ դեպքը հետագայում չի ներառվել 2022 թվականի մահացու ելքով վթարների պաշտոնական վիճակագրության մեջ։
Փորձագետը նաև անդրադարձել է ուղեկցող վաշտի հրամանատարի՝ դեպքի վայր վերադառնալու հանգամանքին՝ նշելով, որ վերջինս վերադարձել է միայն երկու ժամ անց՝ հագուստը փոխելուց հետո։
Վրթանեսյանի կարծիքով՝ վարչապետի կողմից հանրային արձագանքի բացակայությունը նպատակ է ունեցել թեմային հավելյալ տեսանելիություն չտալ։
Երևանի Պարոնյան-Լեո փողոցների խաչմերուկում 2022-ի ապրիլի 26-ին Փաշինյանի ավտոշարասյանն ուղեկցող ՃՈ ավտոմեքենան մահացու վրաերթի էր ենթարկել հղի կնոջը, ինչից հետո մեքենաներից որևէ մեկը կանգ չէր առել։ Ըստ մեղադրանքի՝ վրաերթի ենթարկելուց հետո Նավասարդյանը թողել էր դեպքի վայրը և հեռացել։ ՃՈ մեքենայի վարորդը ձերբակալվել էր, ապա ազատ արձակվել։ 2024-ի դեկտեմբերին Երևանի ընդհանուր իրավասության դատարանն անօրինական էր համարել հղի կնոջը մահացու վրաերթի ենթարկելու գործով Փաշինյանի ավտոշարասյան ղեկավար կազմի նկատմամբ քրեական հետապնդում չհարուցելու որոշումը։
Փաշինյանը 2025-ի հուլիսին հայտարարել էր, որ Մնացականյանի վրաերթի դեպքով որևէ պատասխանատվություն չունի, քանի որ իրեն ուղեկցող ավտոշարասյան մեջ սովորական քաղաքացու նման «ավտոբուսի» ուղևոր էր։
Նյութը թարմացվել է՝ 27․04․2026 I 17։30
