ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է ռուս հեռուստահաղորդավար Վլադիմիր Սոլովյովի հայտարարությունները։
«Դա լրագրողի կարծիք է։ Ընդգծում եմ՝ կարծիք։ Երկրորդ, այն արտահայտվել է Соловьев-live մասնավոր ալիքով»,- ասել է նա։
Նշելով, որ կարդացել է Սոլովյովի հայտարարություններից հատվածներ, այլ ոչ թե «կոնտեքստից կտրված արտահայտություններ», Զախարովան նաև նշել է, որ հաղորդավարի կարծիքը ձևակերպվել է որպես հարց, այլ ոչ թե հայտարարություն։
Նրա խոսքով՝ Սոլովյովի հայտարարությունները «բազմոցային վերլուծաբանների կողմից ներկայացվել են սադրիչ ձևով, գործնականում՝ որպես Ռուսաստանի պաշտոնական դիրքորոշում»։
«Նման մանիպուլյացիան անընդունելի է։ Ավելին, որոշ մեկնաբաններ ակնհայտորեն օգտվել են առիթից՝ Ռուսաստանի հետխորհրդային պետությունների նկատմամբ ենթադրյալ ագրեսիվ մտադրությունների մասին մի ամբողջ շարք բացարձակ չհիմնավորված ենթադրություններ տարածելու համար»,- հայտարարել է նա։
Այս առումով Ռուսաստանի արտաքին գործերի նախարարության ներկայացուցիչն ընդգծել է, որ պաշտոնական դիրքորոշումը արտահայտում են լիազորված պաշտոնյաները։
«Ինչ վերաբերում է Ռուսաստանի պաշտոնական դիրքորոշմանը, ապա այն տասնյակ անգամներ հնչեցվել է Ռուսաստանի ղեկավարության կողմից մեր քաղաքականության վերաբերյալ՝ մեր ընդհանուր խորհրդային անցյալի, հետխորհրդային տարածքի և ներկայումս ինքնիշխան պետությունների հետ հարաբերությունների համատեքստում»,- հայտարարել է Զախարովան։
Նա շեշտել է, որ Ռուսաստանը և Հարավային Կովկասի ու Կենտրոնական Ասիայի ժողովուրդները պատմականորեն կապված են «բարիդրացիության, ռազմավարական գործընկերության, դաշինքի, եղբայրական բարեկամության և համագործակցության հարաբերություններով»։ Նրա խոսքով՝ երկրների միջև կապերի առաջընթաց զարգացման բանալին «բարեկամ պետությունների ղեկավարների միջև փոխադարձ հարգանքի և վստահության վրա հիմնված լավ անձնական շփումներն են»։
Հունվարի 11-ին Սոլովյովը հնարավոր էր համարել ռազմական գործողություններն այն տարածաշրջաններում, որոնք նա համարում է Ռուսաստանի «ազդեցության գոտի»։ Նա հայտարարել էր, թե «Հայաստանը կորցնելը չի բխում Ռուսաստանի շահերից, և Ռուսաստանը միայն Ուկրաինայում չէ, որ պետք է հատուկ ռազմական գործողություն իրականացնի, այլև Ռուսաստանի ազդեցության գոտու տարածքներում՝ թքած ունենալով միջազգային իրավունքի վրա»։ Հաջորդ օրը Երևանում Ռուսաստանի դեսպան Սերգեյ Կոպիրկինը կանչվել էր ՀՀ ԱԳՆ, որտեղ նրան բողոքի նոտա էին հանձնել հեռուստահաղորդավարի հայտարարությունների վերաբերյալ։
«Մեր ձևով» շարժման համակարգող Նարեկ Կարապետյանն արձագանքելով Սոլովյովի խոսքերին՝ հայտարարել էր, որ Հայաստանի Հանրապետությունը կլինի ու կմնա ինքնիշխան, «մեր բարեկամներին ու հարևաններին հարգում ենք, բայց մեզանից շատ չենք հարգում»։
