«ՀայաՔվե» նախաձեռնության համակարգող Ավետիք Չալաբյանը պաշտոնական դիմում է ուղարկել Կոռուպցիայի կանխարգելման հանձնաժողով՝ պահանջելով վարույթ հարուցել ՀՀ վարչապետ Նիկոլ Փաշինյանի դեմ՝ պաշտոնատար անձանց վարքագծի կանոնները ենթադրաբար խախտելու համար, տեղեկանում ենք նրա Ֆեյսբուքյան էջից։
Չալաբյանը նշել է, որ հանձնաժողովին ուղղված դիմումը կապված է Արաբկիրում նախընտրական քարոզարշավի ժամանակ տեղի ունեցած միջադեպի, ինչպես նաև Փաշինյանի քաղաքական հակառակորդների դեմ արված հայտարարությունների հետ, որոնք նա համարում է սպառնալիք։
«Եթե դուք էլ եք ձեզ վիրավորված համարում Փաշինյանի գռեհիկ և սպառնալից արտահայտություններից, կարող եք նմանատիպ պահանջ ներկայացնել նույն հանձնաժողովին»,- եզրափակել է Չալաբյանը։
Մայիսի 18-ին Փաշինյանը վիճաբանել էր Արփինե Սողոյանի հետ Երևանի Արաբկիր թաղամասում և սպառնացել «կզեցնել» ՀՀ նախկին նախագահներ Ռոբերտ Քոչարյանին և Սերժ Սարգսյանին, «Բարգավաճ Հայաստան» կուսակցության առաջնորդ Գագիկ Ծառուկյանին և «Հզոր Հայաստան» դաշինքի վարչապետի թեկնածու Սամվել Կարապետյանին։
