Սահմանային խորություններում հակառակորդի ԶՈւ կուտակումներ չկան, պահպանվում է հարաբերական կայունություն, «Եռաբլուր» զինվորական պանթեոնում ասել է ՀՀ ԶՈւ ԳՇ պետ Էդվարդ Ասրյանը:
Նա նշել է, որ որոշ հատվածներում հակառակորդը շարունակում է մնալ ՀՀ ինքնիշխան տարածքում, ինչը մտահոգիչ է։
«Այո, քաղաքացիները մտահոգություններ պետք է ունենան, որովհետև հակառակորդը շարունակում է մնալ ՀՀ ինքնիշխան տարածքում: Ադրբեջանի պաշտպանության նախարարի ռազմատենչ հայտարարությունները մեզ միշտ էլ մտահոգում են, սակայն օպերատիվ գնահատականում դրանք փոքր մաս են կազմում»,- շեշտել է Ասրյանը:
Ըստ նրա՝ ՀՀ ԶՈւ-ն ուշադիր հետևում է և՛ սահմանին տիրող վիճակին, և՛ Բաքվից հնչող հայտարարություններին՝ կատարելով իր առջև դրված խնդիրը:
«Մեր առջև դրված խնդիրը կատարում ենք, քաղաքական ղեկավարության հետ գնում ենք խաղաղության, սահմանազատման, սահմանագծման ճանապարհով, ԶՈւ-ն էլ շարունակում է զարգանալ, համալրվել»,- հավելել է Ասրյանը։
Պաշտոնյայի խոսքով՝ Ջերմուկից ադրբեջանական ուժերի դուրսբերումն այլև սահմանագծման ու սահմանազատման շրջանակում լուծվող խնդիր է։
«Ես այդ հարցին պատասխանել չեմ կարող։ Դրա համար կա սահմանազատման ու սահմանագծման հանձնաժողով»,- ընդգծել է ԶՈւ ԳՇ պետը։
Հայաստանի արտաքին հետախուզությունը հունվարի 23-ին քիչ հավանական էր համարել Ադրբեջանի կողմից լայնամասշտաբ հարձակումը: Միևնույն ժամանակ ԱԽ քարտուղար Արմեն Գրիգորյանն Ադրբեջանի կողմից հնչող հայտարարությունները մտահոգիչ էր համարել:
2022 թվականի սեպտեմբերի 12-ի լույս 13-ի գիշերն Ադրբեջանի զինված ուժերը լայնածավալ ագրեսիա էին սկսել Հայաստանի Հանրապետության նկատմամբ՝ գնդակոծելով Գորիսի, Սոթքի և Ջերմուկի դիրքերը: Պաշտոնական տվյալներով՝ 2022-ի երկօրյա մարտական գործողությունների հետևանքով հայկական կողմը 233 զոհ ունի։
2022թ. սեպտեմբերյան մարտերում մինչև այժմ անհետ կորած էին համարվում 19-ամյա ժամկետային Թոռնիկ Սարգսյանն ու 33-ամյա պայմանագրային Շիրազ Խաչատրյանը։ Նրանց մասունքներն Ադրբեջանը Հայաստանին էր փոխանցել 2024թ․ հունիսի 21-ին։ Հուլիսի 2-ին ՔԿ-ն հայտնել էր, որ 2022 թվականի սեպտեմբերյան պատերազմի հետևանքով գտնվելու վայրն անհայտ՝ ՀՀ ԶՈւ երկու զինծառայողի ինքնությունը պարզվել է։
