«Տաշիր» ընկերությունների փոխնախագահ Նարեկ Կարապետյանն զգուշացրել է իշխանությունների կողմից նույն ընկերության նախագահ, բարերար Սամվել Կարապետյանի ստեղծած նոր քաղաքական ուժի դեմ ուղղված երեք կեղծ թեզի մասին։
Կարապետյանի խոսքով՝ իշխանությունները մտադիր են այդ թեզերն օգտագործել հասարակության մեջ հակադրություն ստեղծելու, նրանց հեշտ կառավարելու կամ հասարակաությանը հիասթափեցնելու բոլոր այն ուժերից, որոնք նոր գաղափարներ են առաջարկում։
Առաջին կեղծիքը, նրա խոսքով, այն է, որ Ռուսաստանն է ուղարկել Կարապետյանին՝ Հայաստանում ռուսական ազդեցություն տարածելու համար։ Կարապետյանը թեզը բացառող փաստեր է բերել՝ անդրադառնալով նաև Հայաստանը «գուբեռնիա» դարձնելու մեղադրանքներին։ Կարապետյանը հռետորական հարց է տվել՝ նշելով՝ իրականում ո՞վ է Հայաստանը «գուբեռնիա» դարձնում։ Այս համատեքստում նա ընդգծել է, որ 2018-ին Ռուսաստանի դերը Հայաստանի առևտրային շրջանառությունում 27% էր, հետո հասավ 45%-ի։ Նրա խոսքով՝ 2024-ի տվյալներով՝ լրացուցիչ 15% է ավելացել՝ ՌԴ-ից եկող ու Արաբական Միացյալ Էմիրություններ գնացող ոսկու և թանկարժեք մետաղների արտահանման հաշվին։ Այսինքն, վերջին 7 տարիներին ՌԴ-ի դերը Հայաստանի առևտրաշրջանառության մեջ 27%-ից հասել է 60%-ի։ Կարապետյանի խոսքով՝ սա անհավասարակշիռ տնտեսական քաղաքականության և մեկ շուկայից կախվածության հետևանք է։
Կարապետյանն առաջարկել է տնտեսական այլ գործընկեր գտնել, որի հետ պետք է աշխատել առանց հակադրությունների։ Նրա խոսքով՝ տնտեսության դիվերսիֆիկացիան շատ կարևոր է՝ հաշվի առնելով Լարսի հետ կապված, ինչպես նաև տարածաշրջանային կոնֆլիկտները։
Երկրորդ կեղծիքը վերաբերում է «Տաշիր» ընկերությունների նախագահի՝ նախկին իշխանությունների հետ կապերին։ «Տաշիր»-ի փոխնախագահը հիշեցրել է, որ երկրի բոլոր նախկին նախագահները միշտ ձգտել են համագործակցության ներգրավել հայկական սփյուռքի ականավոր ներկայացուցիչներին և խոշոր ներդրողներին։ Նա նշել է, որ Կարապետյանին երկրի նախկին ղեկավարները բազմիցս հրավիրել են ներդրումներ իրականացնելու, և այդ նպատակով ստեղծվել են աշխատանքային, փոխադարձ հարգանքի վրա հիմնված հարաբերություններ։ Նա ընդգծել է, որ հարաբերությունները հիմնված էին հարգանքի վրա, բայց կողմերի անցած ճանապարհները տարբերություններ ունեն։
«Սամվել Կարապետյանի անցած ճանապարհը տնտեսական ճանապարհ է, զրոյից ամեն ինչ ստեղծելու, ենթակառուցվածքներ զարգացնելու և թիմեր ստեղծելու ճանապարհ է։ Պետական ապարատի ճանապարհը մի փոքր այլ է, որը նույնպես արժանի է հարգանքի»,- բացատրել է «Տաշիր»-ի փոխնախագահը։
Նրա կարծիքով՝ այն քաղաքական ռազմավարությունը, որը հաջողել է 2000-ականներին, 2010-ականներին, չի կարող արդյունավետ լինել 2030 թվականին, քանի որ բոլորովին այլ մարտահրավերներ են լինելու։ Կարապետյանը այս համատեքստում նշել է քաղաքական նոր ուժի՝ ավելի պրոֆեսիոնալ կառավարելու հիմքերը, որի առաջնային սկզբունքի շուրջ են ձևավորվելու մյուս բաղադրիչները։
«Իսկ ո՞րն է հիմնական գաղափարը։ Եթե կառավարման մեջ կա պրոֆեսիոնալ, որը առաջին՝ տիրապետում է իր գործին, երկրորդ՝ ձեռքերը մաքուր են․ նա, չնայած իր քաղաքական հայացքներին, պետք է մեծ դեր զբաղեցնի երկրի զարգացման մեջ։ Մեր բոլոր իշխանություններն ունեցել են մեկ խնդիր՝ քաղաքականացրել են պետական կառավարումը։ Երկրի համար ուժեղ ղեկավար կազմ ունենալու համար պետք է ապաքաղաքականացնել որոշումներ կայացնողներին՝ ունենալով բացառապես պրոֆեսիոնալիզմի հիմքով պետական համակարգեր։ Մեր քաղաքական թիմն էլ գիտի և գնահատում է պրոֆեսիոնալիզմը։ Քաղաքականացված պետական ապարատով հաջողությունների հնարավոր չէ հասնել»,- շեշտել է Կարապետյանը։
Երրորդ կեղծիքը, ըստ «Տաշիր»-ի փոխնախագահի, ավելի շատ մանիպուլյացիա է, որի նպատակը սփյուռքի Հայաստանի կյանքում նվազեցնելու փորձն է։
«Շվեյցարիայում մեր երկրի ղեկավարը հայտարարում է, որ սփյուռքը պետք է Հայաստանի համար աջակցող ինստիտուտ չլինի։ Սփյուռքն ամեն տարի Հայաստան է ուղարկում 5 մլրդ դոլար։ Դա մեր ՀՆԱ-ի 20-25%-ի չափն է։ Հայաստանում 500 հազար մարդ օգնություն է ստանում սփյուռքից, և եթե այն չլինի, այդ մարդիկ կհայտնվեն աղքատության ճիրաններում։ Այսօր բնակչության 23%-ն աղքատ է։ Խոսքը մոտ 600-ից 700 հազար մարդու մասին է։ Հաշվի չառնելով այս մեծ աղքատության բեռը մեզ վրա՝ ընկել ենք ինչ-որ արտաքին քաղաքական սխեմաների հետևից և տնտեսությամբ լրջորեն չենք զբաղվում։ Մեր խնդիրը օր առաջ այդ 23% աղքատությունը վերացնելն է, բարձր աշխատավարձերի կայուն աճ ապահովելը»,- հավելել է Կարապետյանը։
Նա ընդգծել է սփյուռքի ներուժի օգտագործման կարևորությունը՝ նշելով, որ այն չպետք է լինի պարզապես «Հայաստան գումար ուղարկող կառույց», այլ երկրի զարգացման լիարժեք և ակտիվ մասնակից։ Կարապետյանը կոչ է արել չտրվել նման մանիպուլյացիաներին և չարժեզրկել սփյուռքի դերը։
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր հնչեցնելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում: Հուլիսի 4-ին դատարանն անփոփոխ էր թողել Կարապետյանին կալանավորելու որոշումը։
Հուլիսի 4-ին ի աջակցություն Կարապետյանի տեղի ունեցած հանրահավաքին գործարարը փաստաբանների միջոցով կալանավայրից ուղերձ էր հղել՝ կոչ անելով միավորվել նոր քաղաքական ուժի շուրջ:
Կարապետյանի պաշտպանության խումբը հայտարարել էր գործարարի նկատմամբ ներկայացված նոր մեղադրանքի մասին, որն առնչվում է «փողերի լվացմանը»։ Հուլիսի 14-ին գործարարը տեղեկացրել էր, որ քաղաքական թիմի ձևավորումը մեկնարկել է։
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյան
