«Մեր ձևով» շարժման համակարգող Նարեկ Կարապետյանը մեկնաբանել է շարժման տնտեսական հայեցակարգի երկրորդ կետը, որով առաջարկել են ՀՀ բոլոր փոքր բիզնեսներին ազատել հարկերից։
Կարապետյանը նշել է, որ տնտեսական ծրագիրը ներկայացնելուց հետո շատ են հարցերը հայերնակիցների մոտ՝ կապված, մասնավորապես, ՓՄՁ-ի դրույթի հետ։ Քաղաքացիները, նրա խոսքով, հարցնում են, թե ճի՞շտ է, որ «Տաշիր» ընկերությունների խմբի նախագահ Սամվել Կարապետյանը որոշել է բոլոր փոքր բիզնեսի ներկայացուցիչներին ազատել հարկերից։
«Այո՝ ճիշտ է։ Հայաստանում գործող բոլոր փոքր բիզնեսի ներկայացուցիչներն ազատվելու են հարկերից»,- վերահաստատել է Կարապետյանը։
Նա հավելել է, որ հարկերից ազատվելու են կրպակները, փոքր խանութները, գեղեցկության սրահները, ավտոլվացման կետերը և ծառայություններ մատուցող բոլոր փոքր ընկերությունները։
«Սա կարևոր քայլ է, այստեղ կա տնտեսական նպատակահարմարություն։ Մենք դա անում, որ այս ընկերություններն սկսեն մեծանալ, որ խնայած միջոցների հաշվին նրանք նոր աշխատատեղ ստեղծեն, նոր մարդիկ ներգրավվեն, որ հաղթենք գործազրկությանը Հայաստանում, ինչն աղքատության հիմքն է»,- նշել է Կարապետյանը։
Նրա խոսքով՝ հաճախ իրենց նաև հարցնում են, թե ինչպե՞ս է բյուջեն դիմանալու, եթե ՓՄՁ-ներին ազատեն հարկերից։
«Լավ հարց է, բայց մի տարօրինակ թիվ ասեմ ձեզ․ Հայաստանում շրջանառության հարկով հարկվող ամբողջ փոքր բիզնեսը վճարում է ընդամենը մեր բյուջեի 2,5%-ը։ Վստահեցնում եմ, որ մեծ բիզնեսի և տարբեր տնտեսական ծրագրերի հաշվին տասնյակ տոկոսներով ենք բյուջեն ավելացնելու և փոքր բիզնեսին հարկելու կարիք չի լինի»,- շեշտել է նա՝ ընդգծելով, որ պետությունը չպետք է խանգարի փոքր բիզնեսին։
Կարապետյանն անդրադարձել է պաշտոնյաներից մեկի կողմից իրեն առնչվող մի դիտարկման՝ կապված զինծառայության հետ։ Կարապետյանը հակտարարել է, որ 8 տարի առաջ զինկոմիսարիատ դիմում էր ուղարկել ծառայության անցնելու մասին։
«Պետական պաշտոնյաներից մեկն ասել է, որ ես բանակում չեմ ծառայել։ Սա իմ նամակն է՝ գրված ութ տարի առաջ, որտեղ խնդրել եմ ինձ զորակոչել պարտադիր ժամկետային զինվորական ծառայության»,- նշել է նա՝ ցույց տալով փաստաթղթերը։
Կարապետյանը հավելել է, որ թեպետ նախարարությունից բացասական պատասխան է ստացել, բայց զինվորական գիտելիքները լրացնելու համար սովորել է մասնագիտացված կառույցում։ Նա նշել է, որ իր ուսումնառությանն ավելի մանրամասն կանդրադառնա շարժման՝ անվտանգային ծրագիրը ներկայացնելիս։
Կարապետյանը հունվարի 20-ին ներկայացրել էր Սամվել Կարապետյանի կողմից առաջարկված տնտեսական զարգացման հայեցակարգը։ Այն բաղկացած է հինգ առանցքային քայլից, որոնք, ըստ նախաձեռնողների, կապահովեն Հայաստանի տնտեսական թռիչքն ու ժողովրդագրական կայունությունը։
