Երևանի քաղաքապետ Տիգրան Ավինյանը հայտնել է միասնական տոմսային փաթեթների՝ փետրվարի 2-ից ուժի մեջ մտնող սակագների վերանայման հնարավորության մասին, տեղեկացրել է նա Facebook-յան իր էջում։
Նա ընդգծել է, որ վերանայման հնարավորությունը դիտարկել են նոր սակագների վերաբերյալ քաղաքացիների արձագանքներն ու առաջարկություններն ուսումնասիրելու արդյունքում։ Ավինյանը հավելել է, որ սակագները վերանայելու առաջարկները քննարկելու են փետրվարի 11-ի Երևանի ավագանու նիստի ժամանակ։
«Առաջարկելու ենք 10 ուղևորության համար սահմանել 2000 դրամ սակագին, օգտագործման ժամկետը 45 օր՝ ներկայիս 2200 դրամի և 30 օրվա փոխարեն, 300 դրամ սակագին՝ օգտագործման ժամկետը 180 րոպե՝ ներկայիս 90 րոպեի փոխարեն, 1 օրվա փաթեթի համար 900 դրամ՝ անսահմանափակ ուղևորություններ՝ ներկայիս 8 ուղևորափոխադրման սահմանափակման փոխարեն»,- գրել է Ավինյանը՝ հավելելով, որ 7 օրվա փաթեթի համար առաջարկում են սահմանել 5000 դրամ անսահմանափակ ուղևորափոխադրումներ՝ ներկայիս 30 ուղևորափոխադրման սահմանափակման փոխարեն։
Հունվարի 1-ից գործող փաթեթներում քաղաքային իշխանությունը փոփոխություն չի նախատեսում։ Անսահմանափակ ուղևորափոխադրումներով 30 օր ժամկետով փաթեթի համար քաղաքացիները կշարունակեն վճարել 9000 դրամ, 24 000 դրամ կվճարեն 90 օր ժամկետով անսահմանափակ ուղևորափոխադրումների համար, իսկ 1 տարվա անսահմանափակ ուղևորափոխադրումներով փաթեթի սակագինը կմնա 90 000 դրամ։
«Առաջիկայում Երևանի ավագանու նիստի ընթացքում կհայտարարվի նաև այլ փոփոխությունների և լրացումների մասին, որոնք համակարգը երևանցիների համար ավելի հարմարավետ և արդյունավետ կդարձնեն։ Մեր նպատակը համապարփակ և արդարացի լուծում տալն է՝ հաշվի առնելով թե՛ մարդկանց պահանջները, թե՛ քաղաքային բյուջեի կայունությունը»,- նշել է Ավինյանը։
2024 թվականի մարտի 12-ին Երևանի ավագանին ընդունել էր տոմսերի միասնական համակարգ ներդնելու նախագիծը։ Ավինյանը հունիսի 25-ին ասել էր, որ 2025 թվականի հունվարի 1-ից կսկսի գործել հասարակական տրանսպորտի ուղեվարձի միասնական համակարգ, որը նախատեսում է տրանսպորտի թանկացում։
Նոյեմբերի 3-ին Երևանի նախկին քաղաքապետ, «Նոր ուժ» կուսակցության նախագահ Հայկ Մարությանը հայտարարել էր հունվարի 1-ից Երևանում հասարակական տրանսպորտի ուղեվարձի թանկացման դեմ ստորագրահավաք սկսելու մասին։ Նոյեմբերի 19-ին Երևանի ավագանին ընդունել էր տրանսպորտի սակագների արտոնությունների փաթեթը, ըստ որի տրանսպորտից օգտվող առանձին խմբերի համար կգործեն այլ սակագներ, առանձին խմբեր տրանսպորտից անվճար կօգտվեն։
2024-ի դեկտեմբերին ավագանին որոշել էր գործող 100 դրամ ուղեվարձն էլեկտրոնային վճարման դեպքում պահպանել մինչև փետրվարի 1-ը։
Հունվարի 15-ին Երևանի ավագանու «Ազգային առաջընթաց» խմբակցության անդամ Իզաբելլա Աբգարյանը հայտնել էր, որ Մարությանը 76 հազար ստորագրություն է հավաքել ընդդեմ հասարակական տրանսպորտի սակագնի բարձրացման։
Մարությանը և «Մայր Հայաստան» դաշինքի առաջնորդ Անդրանիկ Թևանյանը հունվարի 19-ին կոչ էին արել փետրվարի 1-ից բոյկոտել մայրաքաղաքում տրանսպորտի սակագինը բարձրացնելու իշխանությունների ծրագրերը։
