44-օրյա պատերազմում զոհված Հայկազ Մկրտչյանի դիմանկարը հեռացրել են Հայաստանի պետական տնտեսագիտական համալսարանի գետնանցման պատից, հայտնել է նրա քույրը՝ Արևիկ Մկրտչյանը։
«Որքան էժան եք դուք, քեմալական պայմանագրի ներկայացուցիչներ և քեմալիստներ, որ ձեր «պայքարը» զոհված տղաների նկարների դեմ է։ Հիմա էլ վախենում եք նրանց նկարներից, ում զրկել եք կյանքից»,- գրել է նա։
Մկրտչյանը նշել է, որ իր եղբայրն իր անունը ոսկե տառերով է գրել հայոց պատմության էջերում և կհիշվի որպես հերոս։
Կրտսեր սերժանտ, հրետանավոր Հայկազ Մկրտչյան ծնվել է 2000 թ. հոկտեմբերի 31-ին Երևանում։ 2018 թ․-ին ընդունվել է Երևանի պետհամալսարանի Ինֆորմատիկայի և կիրառական մաթեմատիկայի ֆակուլտետը: 2019 թ.-ին զորակոչվել է բանակ` որպես հաշվարկի հրամանատար:
Հայ-ադրբեջանական հուլիսյան բախման ժամանակ մասնակցել է Չինարիի մարտերին:
2020 թ.-ի հոկտեմբերի 14-ից մասնակցել է Ջրականի, Թաղավարդի, Դրախտիկի, Ազոխի մարտերին: Վիրավորվել է հոկտեմբերի 29-ին` անօդաչուի հարվածից, Կարմիր Շուկայում, մահացել նոյեմբերի 9-ին Երևանում՝ Մուրացանի անվան հոսպիտալում:
