Գյումրիի քաղաքապետ Վարդան Ղուկասյանի նկատմամբ հարուցվել է նոր հանրային քրեական հետապնդում՝ խուլիգանության հատկանիշներով, Armenia Today-ը տեղեկացել է Քննչական կոմիտեից։
ՔԿ-ից հավելել են, որ քրհետապնդումը հարուցվել է քրեական վարույթի նախաքննության ընթացքում։
Նշենք, որ Ղուկասյանի նկատմամբ նոր հանրային քրեական հետապնդում է հարուցվել իր որդու՝ Սպարտակ Ղուկասյանի նկատմամբ նախաձեռնված վարույթի նախաքննության շրջանակում։ Նոյեմբերի 20-ին Armenia Today-ը ՔԿ-ից տեղեկացել էր, որ որդու նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 2-րդ մասի 1-ին և 3-րդ կետերով (մի խումբ անձանց կողմից տեղեկատվական կամ հաղորդակցական տեխնոլոգիաներն օգտագործելով կատարված խուլիգանություն, առավելագույն պատիժը՝ 5 տարվա ազատազրկում): Ավելի ուշ նրան կալանավորելու միջնորդություն էր ներկայացվել։
Այս պահին չհաջողվեց փաստաբաններից ճշտել, թե իրավապահներն ի՞նչ հիմքերով և ի՞նչ դեպքերի հիման վրա են նոր քրեական հետապնդումներ հարուցել։
Ղուկասյանի և որդու նկատմամբ մինչ այս նույնպես քրեական վարույթներ էին նախաձեռնվել։ Հոկտեմբերի 20-ի առավոտյան իրավապահները քննչական գործողություններ էին իրականացրել Գյումրիի քաղաքապետարանում, այնուհետև կաշառք պահանջելու մեղադրանքով ձերբակալել համայնքի 8 պաշտոնյայի, այդ թվում՝ Ղուկասյանին, որին դատարանը 2 ամսով կալանավորել էր հոկտեմբերի 21-ի առավոտյան։
Փաստաբանները հոկտեմբերի 26-ին հայտնել էին Ղուկասյանի դեմ քրեական օրենսգրքի 422-րդ հոդվածի 2-րդ մասով նոր գործի մասին՝ Հայաստանի «ինքնիշխանությունից հրաժարվելու հրապարակային կոչերի» համար՝ Ռուսաստանի և Բելառուսի հետ դաշինքի մասին նրա հայտարարությունների պատճառով։
Նրա որդին անցնում էր շորթման հատկանիշներով հարուցված քրեական վարույթով ու գտնվում էր տնային կալանքի տակ։
