«Մեր ձևով» շարժման Գյումրիի համակարգող, փաստաբան Ռուբեն Մխիթարյանը հայտարարել է Հայաստանի դատական համակարգում լրջագույն խնդիրների առկայության մասին։ Նոյեմբերի 20-ին հրավիրած մամուլի ասուլիսի ժամանակ, պատասխանելով Armenia Today-ի հարցին, նա հայտարարել է, որ կալանքի օրերին համակարգի ներսում գտնվելով՝ ավելի հստակ է հասկացել կալանավորների խնդիրները։
«Կալանքն ստեղծված չէ պատժելու համար։ Դրա մասին խոսում է ՀՀ վճռաբեկ դատարանը՝ իր բազմաթիվ նախադեպային որոշումներով, դրա մասին խոսում է Մարդու իրավունքի Եվրոպական դատարանը։ Վստահ եմ՝ շատ մարդիկ ազատության մեջ կլինեին, կալանավայրում չէին անցկացնի իրենց կյանքի թանկ օրերը, ամիսները, այլ կլինեին իրենց ընտանիքի կողքին։ Եվ արդեն դատարանը կկայացներ դատավճիռը, ըստ այդմ՝ պարզ կլիներ՝ ո՛վ է գնալու տուն, ո՛վ է արդարացվելու»,- նշել է նա։
Մխիթարյանը հայտնել է նաև, որ կալանքի օրերին հասցրել է 4 գիրք կարդալ, մշակել «Մեր ձևով» շարժման գործողությունները, մարզվել։
«Երբ ինձ զանգահարում էին, թե ինչ է պետք, միակ բանը, որ բոլորին նշել եմ, գիրքն է։ 20 օրում հասցրեցի կարդալ (մինչև գրքերս բերեցին) 4 գիրք, նաև միացնելով իմ տեսլականը՝ մշակել մեր շարժման բոլոր գործողությունները։ Այդ ընթացքում նաև հասցրեցի մարզվել։ Ես իմ ուղերձում նշել էի, որ անազատության մեջ գտնվելով՝ հիմա շատ ավելի ազատ եմ զգում։ Այդ խոսքերը շատ խորքային են, վստահեցնում եմ՝ դա իրոք այդպես է։ Չասեմ՝ նման վայրերում գտնվելը լավ է, բայց իրականում՝ սոցկայքերից հեռու գտնվելն ինձ շատ օգնեց, այսպես ասած, ռեստարտ լինելու, ավելի լավ, ավելի թարմ մտքերով գալու համար»,- շեշտել է նա։
Փաստաբանը նշել է՝ ոչ մի խնդիր չի տեսնում, որ Գլխավոր դատախազությունը պատրաստվում է բողոքարկել իրեն ազատ արձակելու որոշումը։ Իսկ նրա փաստաբան Լիանա Գասպարյանը պարզաբանել է, որ իրենց համար սպասելի էր այդ որոշումը, պատրաստվում են նույն կերպ շարունակել պայքարը։
«Վերաքննիչ քրեական դատարանի ակտը դեռ չենք ստացել, բայց կայացված որոշմամբ հստակ արձանագրվել է, որ բացակայում է Մխիթարյանին մեղսագրվող հանցավոր արարքի հիմնավոր կասկածը, եթե այդպես չլիներ, ապա Մխիթարյանի նկատմամբ այլ խափանման միջոցներ կամ համակցությամբ ընտրված կլինեին, սակայն այս պահի դրությամբ, ըստ նախնական տվյալների, Մխիթարյանն ազատ է արձակվել հիմնավոր կասկածի բացակայության հիմքով»,- բացատրել է նա։
Հոկտեմբերի 20-ին ուժայինները ձերբակալել, այնուհետ 2 ամսով կալանավորել էին Մխիթարյանին։ Նրան բերման էին ենթարկել, երբ փորձել էր կանխել ոստիկանության կողմից ուժի կիրառումը Գյումրիի քաղաքապետարանի մոտ ակցիա իրականացնողների նկատմամբ։ Նրանք հավաքվել էին՝ ի պաշտպանություն քաղաքապետ Վարդան Ղուկասյանի, որին ավելի ուշ կալանավորել էին։
Նոյեմբերի 18-ին դատարանը վերացրել էր Մխիթարյանի կալանքը։ Նոյեմբերի 19-ին փաստաբան Արտուշ Հակոբյանը տեղեկացրել էր նաև Նարեկ Ղուկասյանի ազատ արձակման մասին։ Նա նշել էր, որ Ղուկասյանը հանրակրթական դպրոցի 12-րդ դասարանի աշակերտ է։
