ԱԺ նախկին պատգամավոր, գեներալ Մանվել Գրիգորյանի դստերը՝ Արմավիրի մարզի առաջին ատյանի ընդհանուր իրավասության դատավոր Նաիրա Գրիգորյանին մեղադրանք է առաջադրվել, Armenia Today-ը տեղեկացել է ՀՀ հակակոռուպցիոն կոմիտեից։
Հավելել են, որ կոմիտեում քննվող քրեական վարույթի շրջանակում դատական իշխանության ներկայացուցչին մեղադրանք է ներկայացվել ՀՀ քրեական օրենսգրքի 441-րդ հոդվածի 2-րդ մասի 5-րդ կետով (պաշտոնատար անձի կողմից լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որն անզգուշությամբ առաջացրել է այլ ծանր հետևանք, առավելագույն պատիժն ազատազրկում՝ 8 տարի ժամկետով-խմբ․): Նրան մեղադրանք է առաջադրվել նաև 482-րդ հոդվածի 1-ին մասով (ակնհայտ անարդար դատավճիռ, վճիռ կամ դատական այլ ակտ կայացնելը, առավելագույն պատիժն ազատազրկում՝ 4 տարի ժամկետով-խմբ․)։
Նոյեմբերի 7-ին Բարձրագույն դատական խորհուրդը բավարարել էր գլխավոր դատախազ Աննա Վարդապետյանի՝ Գրիգորյանի նկատմամբ հանրային քրեական հետապնդում հարուցելու միջնորդությունը։ Գրիգորյանի լիազորությունները կասեցվել էին՝ մինչև քրեական վարույթի ավարտը:
Մանվել Գրիգորյանը մահացել է 2020 թվականին։ Նա 2018-ի իշխանափոխությունից հետո մեղադրվում էր ապօրինի կերպով զենք, զինամթերք պահելու, ավելի քան 101 մլն դրամ յուրացնելու, ինչպես նաև հարկեր վճարելուց խուսափելու, պետական միջոցներից ավելի քան 1 մլրդ դրամ վատնելու և շորթմամբ 37 մլն դրամ արժողությամբ գույքի հափշտակություն կազմակերպելու համար:
Կարդացեք նաև՝
Մանվել Գրիգորյանի ժառանգներից և նրան փոխկապակցված անձանցից կբռնագանձվի ավելի քան 1,2 մլրդ դրամի գույք ու դրամական միջոց
