Վրաստանի հայ համայնքն անընդունելի է համարել Վրաստանում Ադրբեջանի դեսպանատան կողմից 44-օրյա պատերազմի տարելիցին համերգ կազմակերպելը։
Համայնքը Վրաստանի մշակույթի նախարարության ուշադրությունը հրավիրել է այն հանգամանքի վրա, որ նոյեմբերի 6-ին Ադրբեջանի դեսպանությունը կազմակերպում է «Հաղթանակի օրվա 5-րդ տարելից-նոյեմբերի 8» խորագրով համերգ։
Համայնքը բարոյական վրդովմունք է հայտնել, քանի որ նման իրադարձություն տեղի է ունենում այն ժամանակաշրջանում, երբ հազարավոր հայ ընտանիքներ դեռևս տառապում են էթնիկ զտումների հետևանքներից, իսկ Բաքվում կեղծ դատավարություն է ընթանում Ադրբեջանի կողմից անօրինաբար գերեվարված, քաղաքացիական անձանց և տարածաշրջանի նախկին ղեկավարների դեմ:
«2020 թվականի պատերազմի ընթացքում հազարավոր հայեր զոհվեցին, բազմաթիվ ընտանիքներ սպանվեցին, իսկ Արցախի տարածքի 11 458 քմ-ն օկուպացվեց, այդ թվում՝ պատմական Շուշի քաղաքը, և պատմության մեջ առաջին անգամ Արցախը մնաց առանց հայերի՝ Արցախի բնակիչները վտարվեցին իրենց պապական հողերից։ Այդ իրադարձությունները որպես «հաղթանակ» նշելն անընդունելի է»,- ասվում է հաղորդագրության մեջ։
Նշվում է, որ Վրաստանի մշակույթի նախարարությունը, որպես երկրի մշակութային և բարոյական արժեքները պաշտպանող մարմին, չպետք է անտարբեր մնա նման դրսևորումների նկատմամբ, քանի որ Թբիլիսիում նման միջոցառումների անցկացումը նպաստում է էթնիկ բախումների խորացմանը։
Վրաստանի հայ համայնքը հորդորել է դիտարկել պետական մշակութային հաստատություններում նման միջոցառումների անցկացումը կանխելու հնարավորությունը և արտահայտել դիրքորոշում, որը համապատասխանում է հումանիզմի, արդարության և մարդկային արժանապատվության նկատմամբ հարգանքի ոգուն։
2020 թվականի սեպտեմբերի 27-ի առավոտյան Ադրբեջանը՝ Թուրքիայի աջակցությամբ և միջազգային վարձկանների ներգրավմամբ, հարձակվել էր Արցախի Հանրապետության վրա։ 44 օր տևած պատերազմի ընթացքում ադրբեջանական զինուժը հրետանային և հրթիռային հարվածների էր ենթարկել Արցախի խաղաղ բնակավայրերը՝ կիրառելով նաև արգելված զինամթերք, ինչի մասին գրել էին միջազգային լրատվամիջոցները: Պատերազմն ավարտվել էր 2020 թվականի նոյեմբերի 9-ի լույս 10-ի գիշերը՝ Հայաստանի վարչապետի, Ռուսաստանի և Ադրբեջանի նախագահների միջև ստորագրված հայտարարությամբ։
