«Մեր ձևով» ժողովրդական շարժման համակարգող Նարեկ Կարապետյանը իշխանություններին մեղադրել է սխալ առաջնահերթությունների մեջ՝ օրինակ բերելով Մեդովկա գյուղը, որտեղ 2 մլն դոլարով նոր դպրոց է կառուցվել 6 աշակերտի համար, մինչդեռ բնակիչներն իրենց տները լքում են աշխատանք չունենալու պատճառով:
Նա նշել է, որ մոտ 250 բնակիչ ունեցող բնակավայրում դպրոցի կառուցմանն ուղղված միջոցները կարելի էր օգտագործել աշխատատեղերի ստեղծման և դպրոցի գոյություն ունեցող շենքի վերանորոգման համար:
Կարապետյանի խոսքով՝ շատ բնակիչներ, հատկապես տղամարդիկ, ստիպված են արտագնա աշխատանք փնտրել, իսկ ընտանիքներն աստիճանաբար լքում են գյուղը, որը փաստացի դատարկվում է:
Նա ընդգծել է, որ արտադրության մեջ ներդրումները կարող էին լուծել զբաղվածության խնդիրը և կանգնեցնել բնակչության արտահոսքը։
Կարապետյանը նաև հիշեցրել է, որ դպրոցի շինարարությունը ֆինանսավորվել է պետության կողմից 2 մլն դոլարի վարկի հաշվին, մինչդեռ տարեկան բյուջեից վճարվում է շուրջ 120 հազար դոլար այդ վարկի տոկոսի համար:
Կարապետյանն օգոստոսի 4-ին առաջարկել էր Վանաձորում երկու արդյունաբերական նախագիծ իրականացնել՝ պարարտանյութերի արտադրության քիմիական գործարանի վերականգնում և քաղաքում նավթի վերամշակման կենտրոնի ստեղծում:
«Մեր ձևով»-ն առաջարկել էր նաև Մեղրիի զարգացման ծրագիր՝ շեշտը դնելով էներգետիկայի, լոգիստիկայի և բնակարանաշինության վրա։ Առաջարկել են նաև Գեղարքունիքի մարզի զարգացման նախագիծ՝ շեշտը դնելով Սևանում ձմեռային զբոսաշրջության և ձկնաբուծության վրա, ինչպես նաև Հայաստանի քաղաքներում ու գյուղերում գործազրկության կրճատման ծրագիր: Շարժումը տեղեկացրել էր Ալավերդու կենտրոնական զբոսայգու վերակառուցման ծրագրերի մասին:
