Հովհաննավանքի հոգևոր հովիվ Տեր Արամ քահանա Ասատրյանը ենթարկվել է կարգապահական նկատողության, հայտնել է Արագածոտնի թեմի մամլո ծառայությունը՝ հստակեցնելով, որ վերջինս Մկրտության արարողության կատարման ընթացքում թույլ է տվել ծիսական կարգի աղճատում։
Նշվում է, որ Մյուռոնի կանոնական գործածությունը խախտելու պատճառով թեմակալ առաջնորդ Տեր Մկրտիչ եպիսկոպոս Պռոշյանի կողմից Արամ քահանային հանձնարարվել է Ղազարավանի Սուրբ Նարեկ եկեղեցում 10 օր ներկա գտնվել առավոտյան և երեկոյան ժամերգություններին և ձեռնպահ մնալ խորհրդակատարություններ մատուցելուց։
«Տեր Հայրն ընդունել և կատարել է այն, և շարունակում է իր ծառայությունը Հովհաննավանքում։ Այնուհետև, անհասկանալի կերպով, Տեր Արամը նախաձեռնել է իր հայտնի հրապարակումները։ Եկեղեցին ունի համապատասխան կառույցներ, որտեղ յուրաքանչյուր հոգևորական կարող է իրեն անհանգստացնող հարցերը բարձրաձայնել և ստանալ լուսաբանումներ»,- ասվում է հաղորդագրությունում։
Արագածոտնի թեմից նշել են, որ հուզող խնդիրների առնչությամբ Տեր Արամը երբևէ որևէ եկեղեցական ատյանի չի դիմել։
«Ցավում ենք, որ Տեր Հոր անհիմն հրապարակումները օգտագործվում են կեղծ օրակարգեր ձևավորելու համար՝ հերթական անգամ թիրախավորելով եկեղեցուն»,- նշվում է հայտարարությունում։
Սեպտեմբերի 1-ին Տեր Արամը Ֆեյսբուքի իր էջում գրառում էր կատարել՝ խոսելով եկեղեցու ներսում առկա խնդիրների մասին։ Սեպտեմբերի 2-ին նոր գրառմամբ տեղեկացրել էր, որ զանգերով, լռեցման թաքուն ու նենգ փորձերով, անանուն ճնշումներով և սպառնալից ակնարկներով փորձել են իրեն լռեցնել։ Սեպտեմբերի 10-ին ՀՀ վարչապետ Նիկոլ Փաշինյանը հայտարարել էր, որ պատրաստ է կանգնել Տեր Արամի և եկեղեցու խնդիրները վեր հանող հոգևորականների թիկունքին։
