Երևանի քաղաքապետարանը թույլտվություն չի տվել արցախցիների հանրահավաքից հետո նախատեսված հնարավոր երթի և նստացույցի համար՝ չնայած այն հանգամանքին, որ հանրահավաքի թույլտվություն տրվել է, «Փաստինֆո»-ին հայտնել է Արցախի մարդու իրավունքների խորհրդի անդամ Ապրես Մարգարյանը։
«Հանրահավաքն արտոնված է, սակայն Երևանի քաղաքապետարանը չի արտոնել հանրահավաքից հետո երթի ու հավանական նստացույցի կազմակերպումը։ Որոշումը կկայացնենք տեղում՝ ժողովրդի հետ»,- ասել է նա։
Հանրահավաքը տեղի կունենա այսօր՝ ժամը 18:00-ին, Երևանի «Ազատության» հրապարակում։ Այնտեղից մասնակիցները կուղևորվեն դեպի համապատասխան պետական մարմինների շենքերը և կանցկացնեն զանգվածային անհնազանդության գործողություններ, ասված է հայտարարության մեջ։
Խորհուրդը հանրահավաքի մասին հայտարարել էր հունիսի վերջին և Հայ Առաքելական եկեղեցուն, Կիլիկիայի կաթողիկոսարանին, սփյուռքի բոլոր կազմակերպություններին, Արցախի և Հայաստանի հասարակական կազմակերպություններին և քաղաքական ուժերին, արցախյան իշխանություններին և ամբողջ հայ ժողովրդին կոչ էր արել միավորվել արցախյան գաղափարի շուրջ և այդ հարցը դարձնել համահայկական օրակարգ։
