ՀՅԴ-ն հայտնում է իր անդամների տներում խուզարկությունների, մեկ ձերբակալվածի ու բերման ենթարկվածի մասին: Կուսակցության հաղորդագրության մեջ ասված է, որ ուժային կառույցները խուզարկություն են իրականացնում ԱԺ պատգամավոր Գեղամ Մանուկյանի, կուսակցության Գերագույն մարմնի աշխատակազմի ղեկավար Վահագն Մատինյանի, Եղվարդ համայնքի ավագանու անդամ, ՀՅԴ Հայաստանի Երիտասարդական միության Կենտրոնական վարչության նախագահ Գևորգ Մուրադյանի տներում:
«Վաղ առավոտից ուժային կառույցները կրկին ներխուժել են ՀՅԴ անդամների տներ», – նշված է հաղորդագրության մեջ:
Մանուկյանն «Ազատություն» ռադիոկայանի հետ զրույցում ասել է, որ թիրախում իր որդին է:
Ավելի ուշ տարածած երկրորդ հաղորդագրությամբ ՀՅԴ-ն տեղեկացրել է, որ բերման է ենթարկվել կուսակցության Երևանի քաղաքային կոմիտեի անդամ Արսեն Մարտոյանը։ «Հայաստան» խմբակցության պատգամավոր Քրիստինե Վարդանյանն էլ հայտնել է, որ «ԱԱԾ-ն ապօրինաբար առգրավել է» Գեղամ Մանուկյանի հեռախոսը, իսկ որդուն՝ Տարոն Մանուկյանին, ձերբակալել:
Իրավապահ մարմինները դեռ պաշտոնական հաղորդագրությամբ հանդես չեն եկել, և պարզ չէ, թե որն է խուզարկությունների պատճառը կամ հիմքը:
Թարմացում
12։49
Ազգային ճակատը տեղեկացրել է, որ ուժայինները խուզարկում են ՀՅԴ Բյուրոյի նախկին ներկայացուցիչ Հրանտ Մարգարյանի բնակարանը։
