ՀՀ առաջին նախագահ Լևոն Տեր-Պետրոսյանն Ամենայն Հայոց կաթողիկոս Գարեգին Բ-ի հետ քննարկել է երկրի իշխանությունների կողմից եկեղեցու դեմ արշավը և գործարար Սամվել Կարապետյանի ձերբակալությունը դրա համատեքստում, հայտնել է նախագահի խոսնակ Արման Մուսինյանը։
Ըստ Մուսինյանի՝ շուրջ մեկ ժամ տևած զրույցի ընթացքում, Հայաստանի ներկայիս իրավիճակի գնահատականից բացի, անդրադարձ է կատարվել նաև «Տաշիր» ընկերությունների խմբի նախագահ, բարերար Սամվել Կարապետյանի կալանքին։
Տեր-Պետրոսյանը Փաշինյանի գնահատական է տվել՝ նա «պարտության մարմնավորում է»։
«Նա խայտառակ կերպով պարտվեց արցախյան պատերազմում, հաստատաբար պարտվելու է նաև Հայոց եկեղեցուն հայտարարած պատերազմում»,- նշված է հաղորդագրության մեջ։
Հունիսի 25-ին ԱԱԾ-ն խուզարկություններ էր իրականացրել «Սրբազան պայքար» շարժման աջակիցների բնակարաններում: Քննչական կոմիտեն հայտնել էր, որ շարժման աջակիցների տներում քննչական, վարույթային գործողություններ իրականացնելու պատճառը՝ «ՀՀ-ում ահաբեկչական և իշխանությունը զավթելուն ուղղված գործողություններ իրականացնելու» ծրագրին էր առնչվում, ինչը կանխվել է։ Կոմիտեն ավելի ուշ հրապարակել էր կառավարական կայքերի վրա կիբեռհարձակումների, զանգվածային բողոքի ցույցերին մասնակցելու համար խմբերի ձևավորման, ինչպես նաև իշխանությունը փոխելու համար ուժի կիրառման սցենարների թույլտվության մասին ձայնագրություններ։
Իշխանության զավթման փորձի շուրջ քրեական գործը հարուցվել էր Civic.am կայքի հրապարակած փաստաթղթի հիման վրա՝ որակելով այն պետության «Հեղաշրջման պլան»։
