«Տաշիր» ընկերությունների խմբի նախագահ Սամվել Կարապետյանն իր տնից դուրս եկավ ոստիկանության հատուկ ծառայողների ուղեկցությամբ։
«Ես մեր եկեղեցու, մեր ժողովրդի կողքին եմ, ինչքան էլ փորձեն սևացնել։ Թքած ունեմ ցանկացած ՀԷՑ-երի վրա, ամեն ինչ լավ է լինելու։ Ժողովուրդն իր խոսքը կասի, իրենք հասկանալու են»,- ասաց Կարապետյանը:
Նա հավելեց, որ բոլորից շատ գոհ է և ընդգծեց՝ «Չմոռանաք, բոլորին դաս կտանք»։
Այնուհետև գործարարը և իր եղբայրը՝ Կարեն Կարապետյանը, նստեցին իրավապահների մեքենան և ծափերի ներքո հեռացան։
Armenia Today-ի աղբյուրների փոխանցմամբ՝ Կարապետյանին բերման են ենթարկել Նալբանդյան փողոցի վրա գտնվող ՆԳՆ գլխավոր վարչություն։
Կարապետյանի կողմնակիցները նույնպես այնտեղ են գնում։
Հունիսի 17-ին Կարապետյանը մեկնաբանել էր Հայ Առաքելական եկեղեցու դեմ Հայաստանի իշխանությունների արշավը, որից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Գործարարի եղբայրը՝ նախկին պատգամավոր Կարեն Կարապետյանը հայտնել էր, որ ավելի քան 45 անձ է բերման ենթարկվել, այդ թվում՝ ձեռքի կոտրվածքներով։ Նա նաև չէր բացառել, որ գործարարին կարող են ձերբակալել։ Կարապետյանի առանձնատան մոտ հարյուրավոր քաղաքացիներ էին հավաքվել՝ աջակցություն հայտնելու նրան։
