ՀՀ ԿԳՄՍ նախարարությունը և Երևանի քաղաքապետարանը հրապարակել են Երևանում և մարզերում Երեխաների պաշտպանության միջազգային օրվան նվիրված միջոցառումների ցանկը։ ԿԳՄՍՆ ենթակայությամբ գործող գրադարաններում, թատերական կազմակերպություններում և թանգարաններում կիրականացվեն միջոցառումներ, կցուցադրվեն ներկայացումներ (ԿԳՄՍ միջոցառումների ցանկն ամբողջությամբ՝ այստեղ)։
Հայաստանի ազգային գրադարանում ժամը 11։00-ին տեղի կունենա «Այրոգի» ստվերների թատրոնի «Ստվերախաղք՝ Ազգայինում» ներկայացումը։
Խնկո Ապոր անվան ազգային մանկական գրադարանում ժամը 11։00-ին ՆԳՆ ոստիկանության մշակույթի կենտրոնի հետ համատեղ կլինեն Երեխաների պաշտպանության միջազգային օրվան նվիրված երաժշտական կատարումներ, ՖՈՐՍ մանկական պարային ստուդիայի սաների պարային համարները։
Չուբարյանի անվան Արարատի մարզային գրադարանում մայիսի 31-ին՝ ժամը 11:00-ին, տեղի կունենա «Խելահեղ թեյախմություն Ալիսի հետ» խաղ, թեյախմություն, գրքի ընթերցում, նկարչություն։ Հունիսի 2-ին՝ ժամը 11:00-ին, գրադարանում տեղի կունենան նաև գրքային ցուցահանդեսներ, «Ալենի հեքիաթները» գրքի ընթերցում, կավճանկարչություն, մուլտֆիլմի դիտում։
Երևանի քաղաքապետարանը հունիսի 1-ին՝ ժամը 11:00-18:00-ն, երեխաներին հրավիրել է Երևանի կենդանաբանական այգի, ուր նախատեսված է նոր ազատավանդակների և կենդանատեսակների ցուցադրություն, ինչպես նաև զվարճալի խաղեր, թիմային մրցույթներ, մուլտհերոսների հետ հանդիպում, պղպջակների շոու։
«Մինչև 15 տարեկան երեխաների մուտքն անվճար է: Մետրոյի «Երիտասարդական» կայարանի հարևանությամբ կանգառից դեպի Կենդանաբանական այգի քաղաքացիներին կսպասարկեն անվճար ավտոբուսներ»,- հայտնել են քաղաքապետարանից։
