Գերաշնորհ Տեր Արշակ արքեպիսկոպոս Խաչատրյանը և Գուգարաց թեմի առաջնորդ Գերաշնորհ Տեր Հովնան եպիսկոպոս Հակոբյանն անդրադարձել են վարչապետ Նիկոլ Փաշինյանի՝ մայիսի 29-ին կառավարության նիստում եկեղեցուն առնչվող քննադատություններին։
Փաշինյանը հայտարարել էր, որ «հայկական եկեղեցիները չուլանոց, աղբավայր են դարձրել»՝ նշելով, թե ով ինչ իր ունի, տանում, տեղավորում է եկեղեցիներում։
Արքեպիսկոպոս Խաչատրյանը «Սրբավայրերի հանդեպ վարչապետի մահացու սերը» վերնագրով իր գրառման մեջ նշել է, որ եկեղեցիների հարցով բազմիցս են դիմել պետական մարմիններին, սակայն պատասխան չեն ստացել։
«Հուշարձանի կարգավիճակ ունեցող սրբավայրերի պահպանության առնչությամբ՝ 2019 թվականից եկեղեցին մի շարք անգամներ դիմել է պետական մարմիններին և ընդգծել առկա հարցերը համատեղ քննարկելու անհրաժեշտությունը, ինչը, ցավոք, առ այսօր անարձագանք է մնացել ինչպես պետական լիազոր մարմնի, այնպես և հենց կառավարության կողմից: Սրբավայրերի հանդեպ վարչապետի հանկարծական հետաքրքրությունը, այսուհանդերձ, ունի նաև մխիթարական ներուժ: Գուցե երկրի ղեկավարը հանկարծ որոշի նաև նկատել հայկական սրբավայրերի նկատմամբ ադրբեջանական աճող հավակնությունները: Գուցե թե հայացքի արժանանան նաև բռնազավթված Արցախում ոչնչացման վտանգի առջև գտնվող սրբավայրերի պահպանության կենսական խնդիրները»,- գրել է արքեպիսկոպոսը։
Հովնան եպիսկոպոս Հակոբյանը Փաշինյանի հայտարարությունները համարել է «հերթական հարձակում՝ Հայ Առաքելական Սուրբ եկեղեցու վրա»։ Նա Փաշինյանի հայտարարությունը կապել է Շվեյցարիայում տեղի ունեցած Արցախի հայկական հոգևոր և մշակութային ժառանգության պահպանությանը նվիրված միջազգային համաժողովի հետ։
«Այս օրերին Շվեյցարիայում տեղի է ունենում Արցախի հայկական հոգևոր և մշակութային ժառանգության պահպանությանը նվիրված միջազգային համաժողով՝ Ն.Ս.Օ.Տ.Տ. Գարեգին Երկրորդ Ամենայն հայոց կաթողիկոսի նախաձեռնությամբ և գլխավորությամբ: Այնտեղ քննարկվում է Արցախի հոգևոր մշակութային ժառանգության պահպանությունը, արցախահայության՝ իրենց հարազատ բնօրրան անվտանգ վերադարձի, ազատ ապրելու իրավունքի վերականգնումը, ինչպես նաև գերիների անհապաղ ազատ արձակումը։ Համաժողը մեծ դժգոհություններ, վրդովմունք ու անհանգստություններ է առաջ բերել թշնամի երկրում՝ Ադրբեջանում, և նույն ժամանակամիջոցում երկրի գլխավոր դավաճանը հավանաբար ևս վրդովմունք ապրելով՝ նմանօրինակ հարձակում է սկսել եկեղեցու դեմ»,- եզրափակել է նա։
