Ֆրանսիան աջակցում է վերջնական խաղաղության հասնելու և խաղաղության համաձայնագիր ստորագրելու Հայաստանի և Ադրբեջանի ջանքերին, Եվրոպական քաղաքական համայնքի 6-րդ գագաթնաժողովի շրջանակներում հայտարարել է Ֆրանսիայի նախագահ Էմանուել Մակրոնը, փոխանցում է Nouvelles d’Arménie en Ligne-ն։
«Մենք լիովին աջակցում ենք երկու կողմերին այս կարևոր փաստաթղթի՝ խաղաղության համաձայնագրի ստորագրման ճանապարհին»,- վստահեցրել է Մակրոնը:
Այսօր ավելի վաղ Ալբանիայի մայրաքաղաք Տիրանայում հանդիպել էին Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը։ Երկու երկրների ղեկավարները կարևորել էին Հայաստան-Ադրբեջան խաղաղության համաձայնագրի տեքստի համաձայնեցումը։
Մայիսի 15-ին Փաշինյանն ադրբեջանցի լրագրողին տված հարցազրույցում հայտարարել էր, որ Բաքվում կան շրջանակներ, որոնք ձգտում են հակամարտությունը տեղափոխել Հայաստանի տարածք: Նա հիշեցրել էր, որ հայկական կողմն առաջարկում է միաժամանակ ստորագրել խաղաղության պայմանագիր և ԵԱՀԿ-ին ուղղված համատեղ հայտարարություն՝ Մինսկի խմբի կառույցները լուծարելու մասին:
Մարտի 13-ին Ադրբեջանի ԱԳ նախարար Ջեյհուն Բայրամովը հայտարարել էր, որ խաղաղության պայմանագրի տեքստի շուրջ բանակցությունների գործընթացն արդեն ավարտված է։ Պաշտոնական Երևանը հաստատել էր նախագծի հաստատման ավարտը, ավելին՝ հայտարարել, որ պատրաստ է Բաքվի հետ սկսել խորհրդակցություններ համաձայնագրի ստորագրման ժամկետների և վայրի շուրջ։
