Գնալու ենք ժամկետային զինծառայության ժամկետի նվազեցման ճանապարհով, Ազգային ժողովում մամուլի ասուլիսի ժամանակ ասել է «Քաղաքացիական պայմանագիր» խմբակցության պատգամավոր Հայկ Սարգսյանը։
Նրա խոսքով՝ մեծ թվով ՀՀ քաղաքացիներ հրաժարվում են քաղաքացիությունից մինչև 18 տարին լրանալը, որպեսզի ծառայության չանցնեն, իսկ որոշման ընդունվելու դեպքում, վստահ է, ՀՀ-ն զինվորական ծառայություն անցնողների քանակի աճ է ունենալու, ոչ թե նվազում։
«Քանի որ քաղաքացիները խուսափում են ծառայությունից, արդեն իսկ չեն ծառայում, եթե մենք կարողանանք ամբողջությամբ իրականացնել այն ծրագիրը, որը ես ներկայացնում եմ, կունենանք 1 տարում շուրջ 20% ավելի զորակոչված զինծառայողներ»,- հայտարարել է նա։
Իշխանական պատգամավորը շեշտել է՝ 20%-ը բավականին մեծ թիվ է, և թույլ կտա հեշտությամբ լուծել առկա խնդիրները։
«Իմ ձեռքի տակ կարմիրով նշված են քաղաքացիությունից հրաժարվելու դեպքերը․ տեսնում ենք, որ 8721 քաղաքացի հրաժարվել է ՀՀ քաղաքացիությունից։ Այս թվի մեծ լինելը պատկերավոր լինելու համար նշեմ, որ սա մոտավորապես 2 զորակոչի բանակ զորակոչվածների թվին մոտ թիվ է»,- պարզաբանել է Սարգսյանը՝ ցուցադրելով թվաբանական սանդղակը։
Մայիսի 3-ին հայտնել էինք, որ ժամկետային զինվորական ծառայության սահմանային տարիքը կարող է 27-ից դառնալ 37։
