Կանադայի նորանշանակ վարչապետ Մարկ Քարնին դատապարտել է Օսմանյան Թուրքիայում տեղի ունեցած Հայոց ցեղասպանությունը և համեմատել 20-րդ դարի սկզբի իրադարձությունները 2023 թվականին Լեռնային Ղարաբաղում Ադրբեջանի ագրեսիայի հետ։
«Հայ ժողովուրդը շարունակում է բախվել հալածանքների և ճնշումների: Վերջերս դա ողբերգականորեն ցույց տվեց ավելի քան 120 000 բնիկ հայերի բռնի արտաքսումը Լեռնային Ղարաբաղից 2023 թվականի սեպտեմբերին՝ ամիսներ տևած անօրինական շրջափակումից հետո, որը զրկեց նրանց իրենց առանցքային մարդու իրավունքներից»,- ասվում է հայտարարության մեջ:
Քարնին 1915-1923 թվականներին հայերի զանգվածային սպանություններն անվանել է «անիմաստ վայրագություններ, որոնք համակարգված կերպով ծրագրվել և իրականացվել են Օսմանյան կայսրության կողմից»։ Նա հավելել է, որ չնայած 110 տարի անցնելուն, այս ցեղասպանությունը դեռևս ակտիվորեն ժխտվում է դրա կազմակերպիչների կողմից։
Կանադայի վարչապետը հիշել է այն վերապրածներին, ովքեր ցուցաբերեցին քաջություն և համառություն՝ հաղթահարելու անհավանական դժվարությունները և վերականգնելու իրենց կյանքը, իրենց համայնքներն ու հաստատությունները։
Կանադայի արտաքին գործերի նախարար Մելանի Ժոլին նույնպես կոչ է արել հարգանքի տուրք մատուցել 20-րդ դարում Օսմանյան Թուրքիայում տեղի ունեցած Հայոց ցեղասպանության զոհերի հիշատակին և հարգանքի տուրք մատուցել Լեռնային Ղարաբաղի 120 000 հայերի դիմադրողականությանը, որոնք 2023 թվականին բռնի կերպով վտարվել էին իրենց հողերից։
«Մենք հիշում ենք և պահանջում»,- գրել է նա X-ում հայերեն:
Դիվանագետը նշել է, որ Կանադայի և աշխարհի այլ երկրների հայկական համայնքները դեռևս ապրում են ցեղասպանության ողբերգության ցավի և կորստի հետ։
«Լեռնային Ղարաբաղում չափազանց շատ տառապանքներ և ավերածություններ են տեղի ունեցել», – հավելել է Ժոլին։
Կանադացի նախարարը նաև խոստացել է շարունակել պայքարն ատելության, ժխտման և ծայրահեղականության դեմ՝ նշելով Հելսինկիի եզրափակիչ ակտի 50-ամյակը, որը հանգեցրել էր ԵԱՀԿ-ի ստեղծմանը։ Օտտավան կպաշտպանի կանադական արժեքները, ասել է նա, թե՛ հայրենիքում, թե՛ արտերկրում։
Ապրիլի 24-ին Տորոնտոյի հայ համայնքըը հարգանքի տուրք է մատուցել Հայոց ցեղասպանության զոհերի հիշատակին ողբերգության 110-ամյակի կապակցությամբ։
Միջոցառումներն սկսվել էին երիտասարդական կազմակերպությունների ներկայացուցիչների երթով, որոնք կրել էին Հայաստանի և Կանադայի դրոշները։ Նրանք պաստառներ էին պահել, որոնց վրա գրված էր՝ «Մի՞թե 1,5 միլիոն կյանքը բավարար չէր», «Էրդողանն ու Ալիևը ռազմական հանցագործներ են» և «Դիվանագիտությունը չի կանխում ցեղասպանությունը՝ գործեք» գրություններ։ Կանադացի պաշտոնյաները ելույթներ էին ունեցել՝ դատապարտելով ցեղասպանությունը։
Կարդացեք նաև` Ականատեսների հուշեր և փաստեր. Հայոց ցեղասպանության մասին գրքերի ընտրանի
