Ապրիլի 8-ի վաղ առավոտյան Երևանում իրենց մասնագիտական պարտքը կատարելիս վթարի է ենթարկվել շտապօգնության բրիգադը, ինչի հետևանքով բժիշկը մահացել է, հայտնել է ՀՀ առողջապահության նախարար Անահիտ Ավանեսյանը։
Նա տեղեկացրել է, որ բուժքույրը վիրահատվել է, առողջական վիճակն այս պահին գնահատվում է ծանր:
«Իմ խորին ցավակցություններն եմ հայտնում բժշկուհի Ղազարյանի ընտանիքին, հարազատներին»,- գրել է Ավանեսյանը։
Ավելի ուշ Երևանի քաղաքապետի խոսնակ Հայկ Կոստանյանը հայտնել է վթարի մասնրամասները։
«Ժամը 06։00-ի սահմաններում Երևանի Թամանցիների փողոցում շտապօգնության «Տոյոտա» մակնիշի մեքենան դուրս է եկել երթևեկելի գոտուց և բախվել էլեկտրասյանը, ինչի հետևանքով երեք անձ տեղափոխվել է հիվանդանոց։ Ցավով պետք է նշեմ, որ բժիշկն ամրագոտիով ամրակապված չի եղել, ինչի հետևանքով ստացել է ծանր վնասվածքներ, որոնք կյանքի հետ անհամատեղելի էին»,- գրել է Կոստանյանը։
Երևանի քաղաքապետ Տիգրան Ավինյանը ցավակցել է վթարի զոհ դարձած բժշկի ընտանիքին՝ ընդգծելով, որ իր գործին նվիրված մասնագետի կորուստն անդառնալի է։ Նա տեղեկացրել է, որ վարորդը նույնպես հիվանդանոցում է, և թեթև մարմնական վնասվածքներ է ստացել։
