Վարչապետ Նիկոլ Փաշինյանի ավտոշարասյան կողմից հղի Սոնա Մնացականյանին 2022-ին մահացու վրաերթի ենթարկելու գործով մարտի 3-ին տեղի ունեցած դատական նիստին նրա հորեղբայրը սրտամկանի ինֆարկտ է ստացել, Armenia Today-ին հայտնել է փաստաբան Րաֆֆի Ասլանյանը։
«Դատական նիստի ընթացքում նրա ինքնազգացողությունը վատացավ, դուրս եկավ, հետո իր հագուստները տարան ու ասացին, որ ինֆարկտ է ստացել։ Շտապօգնությունը նրան տեղափոխել է թիվ 1 հիվանդանոց, որտեղ հաստատել են, որ նա «աբշիռնի» ինֆարկտ է ստացել»,- մանրամասնել է փաստաբանը։
Ասլանյանը հստակեցրել է, որ առողջական վիճակի մասին տեղեկություններ չունի, քանի որ միայն Սոնա Մնացականյանի հորը՝ Մնացական Մնացականյանին է ճանաչում, որի սիրտը մի քանի օր առաջ են վիրահատել։
«Սոնայի հայրը նյարդային խնդիրներ ուներ և սրտի արդեն երկրորդ վիրահատությունն է տարել։ Պառկած է, փորձում են չտեղեկացնել եղբոր մասին, այդ պատճառով չեմ կարող ճշտել եղբոր վիճակի մասին»,- հավելել է Ասլանյանը։
Փաստաբանի խոսքով՝ հարազատի կորուստը, դատական ամբողջ գործընթացի ձգձգումները, պետության ակնհայտ ուղղորդված մոտեցումը չեն կարող իրենց ազդեցությունը չունենալ մարդկանց վրա։
«Սա նյարդեր քայքայող գործընթաց է, որն իր հետևանքները միշտ ունենում է, թեպետ նրանց վիճակն այս գործընթացի հետ կապելու և գնահատելու համար բավարար բժշկական գիտելիքներ չունեմ»,- ընդգծել է նա։
Անդրադառնալով գործի ընթացքին՝ փաստաբանը շեշտել է ձգձգումների մասին։
«Այս պահին հարցաքնություններն ավարտել ենք, և արդեն մեկ տարի է՝ դատաքննության լրացման փուլում ենք։ Այսինքն՝ պաշտպաններն անընդհատ միջնորդություններ են բերում, որոնք բավարարվում են դատարանի կողմից։ Հիմա խնդրել են, որ կրկնակի փորձաքննության միջնորդության համար ժամանակ տրամադրեն։ Դատարանը տրամադրել է, և մայիսի 22-ին այդ միջնորդությունը պետք է ներկայացնեն ու քննարկենք»,- եզրափակել է Ասլանյանը։
2022-ի ապրիլի 26-ին Երևանի Պարոնյան-Լեո փողոցների խաչմերուկում վարչապետի ավտոշարասյանն ուղեկցող ՃՈ ավտոմեքենան մահացու վրաերթի էր ենթարկել հղի Մնացականյանին, ինչից հետո մեքենաներից որևէ մեկը կանգ չէր առել։ ՃՈ մեքենայի վարորդը ձերբակալվել էր, ապա՝ ազատ արձակվել։
2024-ի սեպտեմբերին Ասլանյանը տեղեկացրել էր, որ հսկող դատախազի որոշմամբ՝ հղի կնոջը վրաերթի ենթարկելու վարույթը կարճվելու է, իսկ ավտոշարասյան ղեկավար պաշտոնատար անձանց նկատմամբ քրեական հետապնդում չի հարուցվի։ Միևնույն ժամանակ՝ նա նշել էր, որ բողոքարկելու է դատախազի որոշումը։
2024-ի դեկտեմբերին Երևան քաղաքի ընդհանուր իրավասության դատարանն անօրինական էր համարել հղի կնոջը մահացու վրաերթի ենթարկելու գործով վարչապետ Նիկոլ Փաշինյանի ավտոշարասյան ղեկավար կազմի նկատմամբ քրեական հետապնդում չհարուցելու որոշումը։
