Հայաստանում կառավարող թիմի և հասարակության շրջանում տեղի է ունենում գաղափարախոսական տրանսֆորմացիա, որը հիմնված է այն բանի վրա, որ ՀՀ-ն դիտարկում է բարձրագույն նպատակ, այլ ոչ թե միջոց՝ այլ նպատակների հասնելու համար, հայտարարել է ՀՀ վարչապետ Նիկոլ Փաշինյանը ԱՄՆ-ի հայ համայնքի հետ հանդիպմանը։
Փաշինյանի խոսքով՝ հեռանում ենք ՀՀ-ն որպես հենման կետ ավելի բարձր ազգային նպատակների հասնելու համար օգտագործելուց՝ կապված պատմական անցյալի հետ։
«Իմ կարծիքով և իմ ընկալմամբ և համոզմամբ՝ ՀՀ-ի մի ընկալում է եղել թե՛ Հայաստանում, թե՛ սփյուռքում, որ ՀՀ-ն մի հենման կետ է ավելի բարձր ազգային նպատակների հասնելու համար։ Այդ նպատակները իմ կարծիքով և համոզմամբ կապված են մեր պատմական անցյալի հետ։ Ընդ որում այստեղ էլ ես չեմ ուզում մանրամասների մեջ մտնել, որովհետև տարբեր մեկնաբանություններ կան, թե հատկապես ո՞ր պատմական անցյալի հետ։ Դա էական չի իմ ասելիքի համատեքստում։ Գաղափարախոսությունը, որ փոխվում է դեպի հետևյալը, որ ՀՀ-ն ինքն է բարձրագույն ազգային նպատակը և ՀՀ-ից ավելի բարձրազգային նպատակ չի կարող լինել։ Եվ ՀՀ-ն ոչ թե ինքը միջոց է այլ նպատակների հասնելու համար, այլ ինքը նպատակն է, ինքը ամենաբարձր նպատակն է»,- ասել է Փաշինյանը։
Նա ընդգծել է, որ շատ կարևոր է կենտրոնանալ նաև ՀՀ գործառույթային նշանակության խնդրի վրա։ Գործառույթային նպատակը հետևյալն է՝ ապահովել սեփական քաղաքացիների անվտանգությունը, բարեկեցությունը և երջանկությունը, ասել է Փաշինյանն ու հավելել, որ «եթե ամերիկան տրամաբանությամբ կամ տերմինաբանության ձևակերպելու լինենք, այս տրանսֆորմացիա թերևս իհարկե շատ հեռավոր ձևով բայց կարող ենք համատել այսպես ասած իզոլիացիոնիզմի հետ»։
Փաշինյանն ավելացրել է, որ այս տրանֆորմացիան անպայման պետք է իրականացնենք, քանի որ այս գաղափարախոսությունն է, որ ՀՀ-ին լինելիության շանս է տալիս:
«Եթե մենք այս գաղափարախոսությունը որդեգրած լինեինք շատ ավելի վաղ, գուցե թե ավելի մեծ երաշխիքներ կլիներ, որ այս գաղափարախոսությունը կապահովի Հայաստանի լինելիությունը։ Բայց մյուս կողմից մյուս կողմից սա արդեն զուտ մտավարժանքի և հետահայաց վերլուծության թեմա է, թե ինչո՞ւ և ինչպե՞ս մենք այդ գաղափարախոսությունը որդեգրեցինք 2018 թվականին և ավելի վաղ,- շեշտել է Փաշինյանը։
Փաշինյանի խոսքով՝ 44 օրյա պատերազմում պարտության միջով անցնելով Հայաստանը ձեռք է բերել անկախ ինքնիշխան պետություն ունենալու հնարավորություն։ Նա կոչ է արել կենտրոնանալ անկախության և ինքնիշխանության հնարավորությունը օգտագործելու վրա, որը Հայաստանը ձեռք է բերել պատերազմի ժամանակ ունեցած կորուստների գնով։
«Չէի ուզի նաև, որ մենք այս վերլուծությունների արդյունքում գանք այն եզրակացության, որ մեր ընկած նահատակների զոհողությունը ոչնչի մասին է եղել։ Ես համաձայն չեմ այդ դիրքորոշման հետ և այս թեմայի մասին էլ եմ շատ երկար մտածել և ինձ մոտ ձևավարվել է համոզմունք, որ այդ զոհողությունները ՀՀ անկախության և ինքնիշխանության համար են եղել։ Մենք հիմա պետք է կենտրոնանանք այդ զոհողության հնարավորություններն օգտագործելու վրա»,- նշել է ՀՀ վարչապետը։
Նույն հանդիպման շրջանակում Փաշինյանը հայտարարել էր, որ ՀՀ հարատևությունը հնարավոր կլինի հարևանների միջավայրում առանց արտաքին օգնության ապրելու դեպքում։
ՀՀ վարչապետի այցի պատվին «Save Armenia»-ի կողմից կազմակերպված ընդունելության ժամանակ Փաշինյանը հայտարարել էր, որ անհրաժեշտ է Հարավային Կովկասում խաղաղության հասնելու օրակարգը ներառել ԱՄՆ քաղաքական էլիտայի առաջնահերթությունների ցանկում։
