Տարբեր փաստերի, տեղեկությունների ու երևույթների վերլուծության հիման վրա Ադրբեջանի կողմից Հայաստանի դեմ լայնամասշտաբ ռազմական հարձակման հավանականությունը բարձր չենք գնահատում, ասված է ՀՀ անվտանգության ռիսկերի վերաբերյալ ՀՀ արտաքին հետախուզության ծառայության զեկույցում։
Միաժամանակ, կառույցը չի բացառել սահմանին տեղային լարվածությունների և էսկալացիայի առաջացման ռիսկը։
«Խաղաղության և միջպետական հարաբերությունների բացակայության պայմաններում, որպես Հայաստանի դեմ ուժի սպառնալիքի ադրբեջանական քաղաքականության գործիքակազմի մաս, կշարունակի պահպանվել սահմանին տեղային լարվածությունների և էսկալացիայի առաջացման ռիսկը, որի որոշակի նվազեցման երաշխիք կարող է լինել 2024 թվականից մեկնարկած սահմանազատման և սահմանագծման գործընթացի սահուն շարունակությունը»,- ընդգծել են ծառայությունից։
Ծառայությունից հավելել են, որ իրենց խնդիրն է շարունակաբար գնահատել, թե արդյոք Ադրբեջանի կողմից Հայաստանի անկախության, ինքնիշխանության և տարածքային ամբողջականության դեմ տարբեր վնասակար խոսույթների հետևողական զարգացումը և ֆինանսավորումը Հայաստանի դեմ ուժի կիրառման սեփական մտադրության «լեգիտիմացման» դրսևորո՞ւմ է։
«Այդ խոսույթներից են, այսպես կոչված, «Արևմտյան Ադրբեջանի և արևմտյան ադրբեջանցիների», «Հայաստանի ռազմականացման», «ռևանշիզմի», «Զանգեզուրի միջանցքի» խոսույթները։ Հայաստանի և Ադրբեջանի միջև խաղաղության և հարաբերությունների նորմալացման գործընթացի ձգձգումներն էականորեն ավելացնում են կայուն խաղաղության հաստատման մասով Ադրբեջանի իրական մտադրության վերաբերյալ անորոշությունը»,- հավելել են կառուցից։
Ծառայության կանխատեսմամբ՝ «Հայաստանի և Ադրբեջանի միջև պայմանագրահենք խաղաղության և դիվանագիտական հարաբերությունների բացակայությունը ստեղծում է միջպետական լարված հարաբերությունների պահպանման իրական ռիսկ, որն ավելի կարող է խորանալ տարածաշրջանում դաշնակցային վերադասավորումների կամ պատմական դաշնակցային հարաբերությունների վերափոխումների ազդեցությամբ»։
«Միջպետական լարված հարաբերությունների պահպանման ռիսկերն ավելացնում են նաև Ադրբեջանի պաշտոնական/իշխանական ագրեսիվ հռետորաբանությունը, Հայաստանի ներքին գործերին միջամտելու փորձերը, ինչպես նաև տարբեր արհեստական թեմաների ավելացման միջոցով բանակցային գործընթացում սեփական միակողմանի պահանջներ պարտադրելու Ադրբեջանի քայլերը։ 2025 թվականի ընթացքում նման գործիքակազմի կիրառման շարունակման հավանականությունը մնում է բարձր»,- կանխատեսել են ծառայությունում։
Կառույցի գնահատմամբ՝ Ադրբեջանը 2025 թվականին շարունակելու է սեփական հարձակողական կարողությունների զարգացման տեմպը՝ կրճատելով ռազմական գործողության անցնելու վերաբերյալ բարձրագույն մակարդակում քաղաքական որոշումից մինչև հողի վրա մարտական գործողության մեկնարկ ժամանակահատվածը։
«Այս շրջանակներում Ադրբեջանը շարունակելու է ավելի շարժունակ ստորաբաժանումների անցման, դրանց ռեզերվի պատրաստման, նոր սպառազինության ձեռքբերման և ներկրման, ինչպես նաև ռազմական ենթակառուցվածքների թարմացման աշխատանքները»,- ասված է զեկույցում։
2024 թվականն ամփոփոխ ասուլիսի ժամանակ ՀՀ ԱԳ նախարար Արարատ Միրզոյանն Armenia Today-ի հարցին ի պատասխան նշել էր, որ քանի դեռ խաղաղության պայմանագիրը փաստ չէ, էսկալացիայի հավանականություն անընդհատ տեսնում է։
Հունվարի 22-ին ԱԺ-կառավարության հարցուպատասխանին նա անդրադարձել էր հունվարի 17-ին բրիտանացի հետախույզների նախազգուշացմանը, որով Միացյալ Թագավորության քաղաքացիներին կոչ էին արել զերծ մնալ Հայաստան-Ադրբեջան արևելյան սահմանից 5 կմ հեռավորության վրա բոլոր ճանապարհորդություններից, չերթևեկել Նոյեմբերյան-Իջևան M16/H26 միջպետական ճանապարհով։ Միրզոյանն ասել էր, որ Միացյալ Թագավորությունը չի խստացնում ՀՀ այցելությունների պայմանները, հակառակը՝ Հայաստանի նկատմամբ արվող ռեկոմենդացիաների մեղմացում կա։
