ՀՀ պաշտպանության նախարար Սուրեն Պապիկյանը կարծում է, որ տարածաշրջանում ռազմական էսկալացիայի հիմքեր չկան։ Նախարարն այս կարծիքը հայտնել է՝ մեկնաբանելով Ադրբեջանի ղեկավարության կողմից հնչեցված վերջին սպառնալիքները։
«Հռետորաբանությունը՝ հռետորաբանություն, բայց ցանկացած ագրեսիայի համար պետք է հիմք։ Ես՝ որպես Պաշտպանության նախարար, չեմ տեսնում, որ կան հիմքեր, որպեսզի տարածաշրջանն էսկալացվի»,- 2024 թվականի արդյունքներով հրավիրված ասուլիսի ժամանակ ասել է Պապիկյանը։
Նա նշել է, որ Հայաստանն ունի առաջարկներ և լուծումներ յուրաքանչյուր վիճելի հարցի վերաբերյալ, և կարող է հրապարակայնորեն հնչեցնել այդ առաջարկներից յուրաքանչյուրը՝ խաղաղության հաստատմանը հասնելու համար։
Պապիկյանը վստահություն է հայտնել, որ Հայաստանի սահմանների անվտանգությունը պետք է երաշխավորվի բալանսավորված քաղաքականությամբ։
«Բեռը դնել միայն զինված ուժերի վրա, բեռը դնել մեկ գործընկերոջ վրա, դա լուծում չէ։ Համատեղ ջանքերով և նաև երկխոսությամբ պիտի լուծենք մեր երկրի առջև ծառացած խնդիրները»,- եզրափակել է ՊՆ ղեկավարը։
Հունվարի 7-ին Ադրբեջանի նախագահ Իլհամ Ալիևը Հայաստանը «տարածաշրջանի համար սպառնալիքի աղբյուր» և «ֆաշիստական պետություն» էր անվանել։ Նա հայտարարել էր նաև, որ Հայաստանի սպառազինումը «միայն նոր լարվածության կհանգեցնի»։
Հունվարի 8-ին Փաշինյանը, արձագանքելով Ալիևին, նշել էր, որ Բաքուն փորձում է տարածաշրջանում էսկալացիայի «լեգիտիմություն» ձևավորել։ Հունվարի 9-ին Փաշինյանն Ադրբեջանին ուղղված 12 առաջարկ էր հրապարակել, որոնց թվում էին ԵԱՀԿ Մինսկի խումբը լուծարելը, փոխադարձաբար էսկալացնող խոսույթներից և պահանջներից հրաժարվելը։
