«Քանաքեռ-Զեյթուն» ԲԿ-ն իր նախկին տեղն է վերադարձրել 44-օրյա պատերազմի ժամանակ անմահացած, Արցախի հերոս Ալբերտ Հովհաննիսյանի նկարով վահանակը, որի հեռացման մասին մարտի 5-ին ահազանգել էր հերոսի հայրը՝ Արտակ Հովհաննիսյանը։
Վերջինս այսօր Armenia Today-ին հայտնեց, որ ցուցանակը, ինչպես նախկինում էր, տեղադրվել է Պլաստիկ վերականգնողական և Միկրովիրաբուժության բաժանմունքի պատին։
«Ցուցանակն այլ տեղ էր փակցված։ Իմ ներկայությամբ ցուցանակը հանեցին ու տեղադրեցին այնտեղ, որտեղ նախկինում էր։ Խոստացան, որ 3 ամսվա ընթացքում բաժանմունքն էլ կտեղափոխեն նույն վայր»,- մանրամասնել է Հովհաննիսյանը։
Հովհաննիսյանը չի հայտնել, թե ինչպես են բժշկական կենտրոնում բացատրել ցուցանակը հանելու պատճառները։ Միայն ասել է, որ ԲԿ-ում ցուցանակը հանելը «թյուրիմացությամբ» են պայմանավորել։
Մարտի 4-ին հերոսի հայրն ահազանգել էր, որ 2021 թվականի փետրվարի 15-ին «Քանաքեռ-Զեյթուն» ԲԿ-ի՝ իր որդու անունով անվանակոչված Պլաստիկ վերականգնողական և Միկրովիրաբուժության բաժանմունքից հեռացրել են համապատասխան ցուցանակը։ Բժշկական կենտրոնից մարտի 5-ին Armenia Today-ին հայտնել էին, որ ցուցանակը կտեղադրեն մարտի 6-ին՝ օրվա երկրորդ կեսին։ Armenia Today-ին մարտի 5-ին թույլ չէին տվել նկարահանումներ իրականացնել ԲԿ-ում։
Ալբերտ Հովհաննիսյանը զոհվել էր 2020 թվականի հոկտեմբերին 8-ին, նրան «Արցախի հերոսի» կոչում էր շնորհվել 2021-ի հոկտեմբերին:
