Վրաստանի նախկին նախագահ Միխայիլ Սաակաշվիլին դիմել է Հայաստանի և Ադրբեջանի ղեկավարությանը՝ խորհուրդ տալով նրանց դիտարկել Ուկրաինա-Մոլդովա օրինակը հարաբերությունների կարգավորման գործընթացում։
«Մենք այժմ կանգնած ենք Հարավային Կովկասում պոտենցիալ ռազմական առճակատման վտանգի առջև՝ հատկապես այն միջանցքի հետ կապված, որն Ադրբեջանին ուղիղ ելք կապահովի դեպի Նախիջևանի իր տարածք։ Նման պատերազմը ոչ միայն կվնասի Ադրբեջանի միջազգային վարկանիշին, այլև կարող է հանգեցնել Հայաստանում իշխանափոխության։ Սակայն այս հարցն ունի այլընտրանքային լուծումներ, որոնք ուժի կիրառում չեն պահանջում։ Խնդրում եմ Ադրբեջանի և Հայաստանի ղեկավարությանը որպես հնարավոր օրինակ դիտարկել Ուկրաինայի և Մոլդովայի միջև առկա համաձայնագիրը։ Այս երկու երկրները պահպանում են բարիդրացիական հարաբերություններ՝ փոխադարձաբար ճանաչելով միմյանց սահմանները»,- ֆեյսբուքյան իր էջում գրել է նա։
Սաակաշվիլիի խոսքով՝ երբ Ուկրաինան պետք է մեկներ Օդեսա քաղաքից Օդեսայի շրջանի հարավային մաս, Մոլդովան պատրաստակամորեն համաձայնեց վարձակալել Դնեստրով անցնող ճանապարհը:
«Որպես Օդեսայի նախկին նահանգապետ, ես հաճախ էի օգտվում այս վարձակալած ճանապարհից ուկրաինացի սահմանապահների հսկողության ներքո, երբ ստիպված էի գնալ ուկրաինական Բեսարաբիա։ Մոլդովան այս համաձայնագրից կոմերցիոն օգուտ է ստանում։ Ադրբեջանի և Հայաստանի միջև իրավիճակի համանման լուծում կիրառելը շահավետ կլինի երկու երկրների համար։ Հայաստանը կարող է առևտրային և ֆինանսական օգուտներ ստանալ, ինչպես նաև օգտվել զգալի տարանցիկ ճանապարհներից»,- գրել է նա։
Սաակաշվիլին հավելել է, որ այսկերպ Ադրբեջանը կարող է խուսափել ռուսական զորքերի շարունակական ներկայության անհրաժեշտությունից, ինչը, ի վերջո, կբերի երկու երկրների միջև խաղաղ գոյակցության։
