Օգոստոսի 26-ին՝ ժամը 19։00-ին, «Գաֆէսճեան» արվեստի կենտրոնում տեղի կունենա Հայաստանի ազգային-ավանդական երգի-պարի «Գութան-2023» փառատոնը։
Փառատոնն իրականանում է «Մրրո» հայ ազգային արվեստի կենտրոնի նախաձեռնությամբ: Նպատակն է պահպանել և տարածել հայկական ազգային-ավանդական երգերն ու պարերը, այն ավելի ճանաչելի դարձնել երիտասարդներին ու փոխանցել սերնդեսերունդ:
Փառատոնի ժամանակ էթնիկ տարբերակով ավանդական երգերի-պարերի ներկայացում կլինի, այսինքն, առանց որևէ ժամանակակից մշակումների: Փառատոնի ժամանակ օգտագործվում են բացառապես ազգային նվագարաններ (դուդուկ, բլուլ, շվի, զուռնա, պկու, կոպալ, դհոլ)։ Կլինի նաև հայ երգի ու պարի երախտավորների գործունեությանը վերաբերող ֆիլմերի ստեղծում և ցուցադրում։
«Գութան-2023» փառատոնին կմասնակցեն «Ակունք», «Կարին», «Սասնա Ծռեր», «Վան», «Մարաթուկցիներ», «Մասունք», «Նուբար», «Վերադարձ», «Մենք ենք մեր սարերը», «Արդվին», «Տավրոս», «Տարոնցիներ», «Արեգ», «Գորանի», «Սեբաստացիներ», «Ծիլք» խմբերը։
