Իշխանության ավելի վաղ հայտարարված սկզբունքը, թե պահեստազորայինները կարող են ընտրել տարվա կոնկրետ իրենց հարմար ժամանակահատված վարժական հավաքներին մասնակցելու համար, փաստացի չի գործում. համապասխան ցուցումներ և հրամաններ զինկոմիսարիատներին չի իջեցվել: Այս մասին գրել է ԱԺ «Պատիվ ունեմ» խմբակցության պատգամավոր Տիգրան Աբրահամյանը:
«Որքան ես եմ հասկանում թեման քննարկվել է, սակայն եզրակացությունն այն է եղել, որ պահեստազորայինների նախընտրություններն ու վարժական հավաքների կազմակերպչական առանձնահատկությունները համադրելի չեն»,- գրել է պատգամավորը:
Որպես հավաքներին վերաբերվող մեկ այլ խնդիր նա նշել է, որ այն հոդվածով, որով զորակոչվում են պահեստազորայինները, ենթադրում է գործատուի պարտավորություն վերջիններիս աշխատանքային հաստիքը պահպանելու վերաբերյալ, սակայն դա չի ենթադրում սահմանված 25-օրյա ժամկետում աշխատավարձի պահպանում:
«Սա նշանակում է, որ եթե, օրինակ, զորակոչված պահեստազորայինը քաղաքացիական կյանքում, 25-օրյա աշխատանքի համար ստանում է 250-300հզ աշխատավարձ, ապա զինված ուժեր հավաքների զորակոչվելու դեպքում 150-170 հզ.»,- գրել է Աբրահամյանը:
Հիշեցնենք, որ մարտի 1-ից մինչև մայիսի 12-ը կանցկացվեն պահեստազորայինների վարժական հավաքներ:
Ըստ նախագծի՝ ռազմատրանսպորտային պարտականություններ ունեցող մարմիններից կներգրավնեն տրանսպորտային միջոցներ, ինչպես նաև կսահմանվեն վարժական հավաքների անցկացման հետ կապված հարաբերությունները:
