Այն, ինչ հիմա կատարվում է Մերձավոր Արևելքում և ինչ կլինի հետո, արդյունքն է այն ամենի, ինչ տեղի ունեցավ Արցախի հետ 2020 թվականին Ադրբեջանի, Թուրքիայի և միջազգային ահաբեկիչների ագրեսիայից հետո, ասել է Արցախի ԱԳՆ նախկին ղեկավար, Արցախի նախագահի խորհրդական, հատուկ հանձնարարությունների գծով ներկայացուցիչ Դավիթ Բաբայանը։
«Փոքր Արցախ-Ղարաբաղն իսկապես հզոր վահան էր արմատականության և էքսպանսիոնիզմի շարժման դեմ»,- գրել է Բաբայանը։
Ադրբեջանը Թուրքիայի անմիջական աջակցությամբ և միջազգային վարձկանների ներգրավմամբ 2020 թվականի սեպտեմբերի 27-ին պատերազմ սանձազերծեց Արցախի Հանրապետության դեմ։ 44 օր տևած պատերազմի ընթացքում ադրբեջանական զինուժն Արցախի խաղաղ բնակավայրերը ենթարկել է հրետանային և հրթիռային հարձակումների, այդ թվում՝ արգելված զենքի կիրառման։
Հիշեցնենք, որ դեկտեմբերի 12-ին մի խումբ ադրբեջանցիներ` «բնապահպանական» պատճառաբանություններով ժամը 10:30-ից փակել են Ստեփանակերտ-Գորիս մայրուղու Շուշի-Քարին տակ հատվածը՝ ոտնահարելով քաղաքացիական բնակչության կենսական շահերն ու իրավունքները: Այսօրվա դրությամբ ճանապարհը շարունակում է փակ մնալ: Արցախի ԱԽ նիստում որոշում է կայացվել դիմել ՌԴ Արցախի Հանրապետությունում տեղակայված ՌԴ խաղաղապահ զորակազմի հրամանատարությանը՝ անընդունելի համարելով միջանցքի փակումը, որը բերելու է Արցախում հումանիտար աղետի:
