Այսօր Ռուսաստանի Դաշնությունում Հայաստանի Հանրապետության արտակարգ և լիազոր դեսպան Վաղարշակ Հարությունյանը, Հավաքական անվտանգության պայմանագրի կազմակերպությանը կից Հայաստանի Հանրապետության մշտական և լիազոր ներկայացուցիչ Վիկտոր Բիագովը և ՀԱՊԿ-ում Հայաստանի Հանրապետության մշտական ներկայացուցչությանը կից Հայաստանի Հանրապետության զինված ուժերի ներկայացուցիչ, գեներալ-մայոր Արտակ Տոնոյանն այցելել են ՀԱՊԿ Միացյալ շտաբ:
Այս մասին Armenia Today-ին հայտնում են ՀԱՊԿ մամուլի ծառայությունից։
Աշխատանքային հանդիպման ընթացքում ՀԱՊԿ միացյալ շտաբի պետ, գեներալ-գնդապետ Անատոլի Սիդորովը հյուրերին տեղեկացրել է ՀԱՊԿ անդամ պետությունների հավաքական շահերի, ինքնիշխանության և տարածքային ամբողջականության պաշտպանությունն ապահովող կազմակերպության Հավաքական անվտանգության համակարգի, նրա կառավարման մարմինների, ուժերի և միջոցների, ինչպես նաև ՀԱՊԿ ձևաչափով զորքերի և ուժերի համատեղ պատրաստման մասին:
Վաղարշակ Հարությունյանը, Վիկտոր Բիյագովը, գեներալ-մայոր Արտակ Տոնոյանն այցելել են ՀԱՊԿ ճգնաժամային արձագանքման կենտրոնի որոշումների ընդունման սրահ, որտեղ իրականացվում է կազմակերպության պատասխանատվության գոտում իրավիճակի և զարգացման միտումների վերաբերյալ տեղեկատվության հավաքումը, վերլուծությունն ու փոխանակումը, ինչպես նաև ՀԱՊԿ կանոնադրական և աշխատանքային մարմինների գործունեությանը տեղեկատվական-վերլուծական և տեղեկատվական-տեխնոլոգիական աջակցությունը՝ ի շահ ՀԱՊԿ անդամ պետությունների անվտանգության ապահովմանն ուղղված որոշումների ժամանակին ընդունման:
Հյուրերին պատմել են նաև ՀԱՊԿ միացյալ շտաբի կառուցվածքային ստորաբաժանումների գործունեության մասին և ներկայացրել միջազգային ռազմական կենտրոնում տեղակայված դասախոսությունների և ցուցասրահի պատմական ցուցադրությանը:
