Արմավիրի մարզի Վարդանաշեն, Երասխահուն, Արազափ և հարակից բնակավայրերի հարյուրավոր բնակիչներ հուլիսի 7-ի առավոտից փակել են Մարգարա-Վանաձոր-Տաշիր ավտոճանապարհը՝ պահանջելով փոխհատուցում կարկուտից տուժած տնտեսությունների համար, հայտնում է Shamshyan.com-ը։
Նրանց խոսքով՝ հուլիսի 6-ին տեղացած կարկուտն ու քամին վնասել են խաղողի, ծիրանի, դեղձի, բանջարաբոստանային և այլ մշակաբույսերի զգալի մասը, ինչպես նաև բնակելի տների տանիքներ, արևային վահանակներ, պատուհաններ և ավտոմեքենաներ։
Բնակիչները պահանջել են հանդիպում պատասխանատու պաշտոնյաների հետ՝ հայտարարելով, որ ճանապարհը կբացեն միայն գերատեսչության ներկայացուցիչների ժամանումից և իրենց կրած վնասների փոխհատուցման հստակ մեխանիզմների վերաբերյալ պարզաբանումներ ստանալուց հետո։
Էկոնոմիկայի նախարարության խոսնակ Լիլիթ Շաբոյանն Armenia Today-ին հայտնել է, բնական աղետների համար գոյություն ունի համապետական հանձնաժողով, որի պատասխանատու նախագահը Ներքին գործերի նախարարությունն է։ Նա հստակեցրել է, որ բնական աղետների դեպքում հարցն ուղիղ էկոնոմիկայի նախարարության տիրույթում չէ։
ՆԳՆ-ից մեզ խոստացան ավելի ուշ տեղեկատվություն հայտնել բողոքի ակցիայի և բնակիչներին առնչվող հարցերի մասին։ Արմավիրի մարպետարան մեր զանգերն անպատասխան մնացին։
ՆԳՆ-ից Armenia Today-ին ավելի ուշ տեղեկացրել են, որ ճանապարհն արդեն բացվել է։ Նախարարությունից հավելեցին, որ ճանապարհը փակվել է 9։20-ից մինչև 10։00-ն։ Նաև հայտնել են, որ տեղական ինքնակառավարման մարմինների ներկայացուցիչներ են եկել ակցիայի վայր և համաձայնության եկել ժողովրդի պահանջի հարցում։
Թարմացված է՝ 7.07.2026 | 17:25
