Վենեսուելայում տեղի ունեցած երկրաշարժերի հետևանքով զոհերի թիվը հասել է 3342-ի, հայտնում է Reuters-ը։
Պաշտոնական տվյալներով՝ երկրաշարժերի հետևանքով վիրավորվել է 16 470 մարդ, ևս 17 345-ը մնացել է անօթևան։ Վենեսուելայի ժամանակավոր նախագահ Դելսի Ռոդրիգեսը հայտարարել է, որ անվտանգության ուժերը գործի են դրվել անմիջապես աղետից հետո։
ՄԱԿ-ի պարենի համաշխարհային ծրագիրը 50 մլն դոլարի հրատապ ֆինանսավորում է հայցել՝ Վենեսուելայում երկրաշարժերից տուժած մինչև 500 000 մարդու առաջիկա 3 ամիսներին սննդային օգնություն տրամադրելու համար։ Կազմակերպությունը նշել է, որ բավարար ֆինանսավորման դեպքում կարող է աջակցությունը հասցնել մինչև 1 մլն մարդու։
UNICEF-ի գնահատմամբ՝ Վենեսուելայի երկրաշարժերից հետո մարդասիրական օգնության կարիք ունի 1,8 մլն մարդ, այդ թվում՝ 680 000 երեխա։ Կազմակերպությունը հայտնել է նաև 47 տոննա առողջապահական, ջրի, սանիտարական և կրթական պարագաների մատակարարման մասին։
Reuters-ի փոխանցմամբ՝ Վենեսուելայի երկրաշարժերի հետևանքով տնտեսական կորուստը կազմել է ավելի քան 10 մլրդ դոլար։
Հունիսի 24-ին Վենեսուելայում տեղի էին ունեցել 7,2 և 7,5 մագնիտուդով երկու երկրաշարժեր։ Մեծի Տանն Կիլիկիո կաթողիկոսության տվյալներով՝ երկրաշարժից հետո կան անհետ կորած և վիրավոր հայեր, ինչպես նաև քանդվել է երկու հայ ընտանիքի տուն։ Ավելի ուշ Վենեսուելայում յոթօրյա ազգային սուգ էր հայտարարվել երկրաշարժերի զոհերի հիշատակին։
