Վենեսուելայի հյուսիսային ափերի մոտ հունիսի 26-ին՝ երկու հզոր ցնցումներից օրեր անց, գրանցվել է նոր՝ 4,9 մագնիտուդով երկրաշարժ, հաղորդել է Reuters-ը՝ հղում անելով Եվրոպա-միջերկրածովյան սեյսմոլոգիական կենտրոնին։
Գործակալության տվյալներով՝ նոր ցնցումներն զգացվել են Կարակասում և Մարակայում։
Associated Press-ը հաղորդել է, որ Լա Գուայրայում՝ երկրաշարժերից ամենաշատ տուժած շրջաններից մեկում, բնակիչները և կամավորները սեփական ուժերով են որոնում անհետ կորած հարազատներին՝ պետական փրկարարների և ծանր տեխնիկայի պակասի պայմաններում։ Իշխանությունները սահմանափակել են մուտքը Լա Գուայրայի որոշ հատվածներ, քանի որ խցանումներն ու անկանոն տեղաշարժը խոչընդոտել են որոնողափրկարարական աշխատանքներին։ Գործակալությունը նշում է, որ երկրաշարժից հետո առաջին 48-72 ժամը համարվում է վճռորոշ՝ փլատակներում մնացած մարդկանց փրկելու համար։
Reuters-ի հաղորդմամբ՝ Վենեսուելա են ժամանել օտարերկրյա փրկարարական խմբեր, այդ թվում՝ Մեքսիկայից և Սալվադորից։ ԱՄՆ-ն հայտարարել է 150 մլն դոլարի օգնության մոբիլիզացման և մարդասիրական օգնության նպատակով պատժամիջոցների մեղմացման մասին։ ՄԱԿ-ը գնահատել է վնասը 6,7 մլրդ դոլար։
Վենեսուելայում հունիսի 24-ին տեղի ունեցած 7,2 և 7,5 մագնիտուդով երկու երկրաշարժների հետևանքով զոհերի թիվը հասել էր 920-ի, իսկ վիրավորներինը՝ 3300-ի։ Շուրջ 51 000 մարդ համարվում է անհետ կորած։ Առավել շատ տուժել են Կարակասի մերձակայքի շրջաններն ու Լա Գուայրայի նահանգը։ Կիլիկիո կաթողիկոսությունը հայտնել էր երկրաշարժից տուժած հայերի մասին։
Վնասված Վենեսուելայի գլխավոր՝ Սիմոն Բոլիվարի միջազգային օդանավակայանը փակվել էր, խափանվել էին էլեկտրամատակարարումը, նավահանգիստների աշխատանքը, փակվել էր Լա Գուայրայի նավահանգստը։
