ՀՀ կառավարությունը հավանություն է տվել ծխախոտային արտադրանքի, էլեկտրոնային ծխախոտի, ալկոհոլային խմիչքների և վառելիքի մի շարք տեսակների ակցիզային հարկի դրույքաչափերը բարձրացնելու օրենսդրական նախաձեռնությանը։
Փաստաթուղթը կուղարկվի խորհրդարանի քննարկմանը։ Օրինագծի ընդունման դեպքում կթանկանան ծխախոտը, ալկոհոլը, բենզինը և դիզելային վառելիքը։Նախագծով առաջարկվում է յուրաքանչյուր տարի 3%-ով ինդեքսավորել ակցիզային հարկով հարկվող ապրանքների դրույքաչափերը։
Ծխախոտային արտադրանքի ակցիզային հարկը նախատեսվում է տարեկան բարձրացնել 7%-ով, տաքացվող ծխախոտինը՝ 30%-ով, իսկ էլեկտրոնային ծխախոտինը՝ առաջին տարում 100%-ով, ապա հաջորդ երկու տարիներին՝ համապատասխանաբար 25% և 20%-ով։Նախատեսվում է նաև առաջին անգամ ակցիզային հարկ սահմանել նիկոտինային տոպրակների համար․ առաջին տարում դրույքաչափը կկազմի 2800 դրամ, ապա հաջորդ երկու տարիներին կավելանա տարեկան 30%-ով։ Նարգիլեի ծխախոտի ակցիզային հարկն առաջին տարում կբարձրանա 40%-ով, իսկ հաջորդ երկու տարիներին՝ տարեկան 30%-ով։
Միաժամանակ, մրգային օղիների արտադրությունը խթանելու նպատակով դրանց ակցիզային հարկի դրույքաչափը նախատեսվում է նվազեցնել 33%-ով։ Նախագծով առաջարկվում է նաև կոնյակի ակցիզային հարկը սահմանել 4000 դրամ՝ մեկ լիտր 100%-անոց սպիրտի հաշվարկով՝ անկախ հնեցման տարիքային խմբից։
Կառավարությունն անհետաձգելի է ճանաչել նախաձեռնությունը և այն կուղարկի Ազգային ժողովի քննարկմանը։ Օրինագծի ընդունման դեպքում ակցիզային հարկի նոր դրույքաչափերն ուժի մեջ կմտնեն օրենքով նախատեսված ժամկետներում։
