Կոտայքի մարզի Բյուրեղավան քաղաքի մի շարք բնակիչներ մի քանի օր է դիմում են Շտապօգնություն` սրտխառնոց, փորլուծություն, փսխում, ջերմության բարձրացում ախտորոշումներով, հայտնել է Shamshyan.com-ը։
Ըստ կայքի՝ թունավորման դեպքեր են գրանցվել Վարդանյան փողոցում գտնվող շենքերում ապրող մի քանի բնակչի մոտ, ովքեր նման ախտանիշներով դիմել են Անդրանիկ Պետրոսյանի անվան պոլիկլինիկա, իսկ մյուս մասը՝ «Աբովյան» ԲԿ։ Նրանք կարծում են, որ թունավորումը ջրից է։
Բոլոր տուժածները հայտնել են, որ իրենք ո՛չ գազից, ո՛չ էլ սննդից են թունավորվել, քանի որ բնակարաններում գազի արտահոսք տեղի չի ունեցել և կասկածելի սնունդ չեն օգտագործել։
Առողջապահության նախարարության մամուլի խոսնակ Մարիամ Ծատրյանի խոսքով՝ վերջին օրերին շտապօգնության կանչեր են գրանցվել ընդհանուր թուլության, փսխումների ու ջերմության գանգատներով:
«ՀՎԿԱԿ-ի մեր մասնագետների կողմից անհապաղ իրականացվել է համաճարակաբանական հետազոտութուն և նմուշառում։ Ծանր դեպքեր չունենք»,- նշել է նա:
Ծատրյանի խոսքով՝ գործընթացն ընթացքի մեջ է, արդյունքների մասին կհայտնեն առաջիկայում:
