«Ուժեղ Հայաստան» կուսակցությունն իր համագումարում հաստատել է առաջիկա խորհրդարանական ընտրությունների պատգամավորության թեկնածուների ցանկը:
Ցուցակի առաջին երեսուն հորիզոնականներն զբաղեցնում են Նարեկ Կարապետյանը, Արամ Վարդևանյանը, Գոհար Մելոյանը, Դավիթ Ղազինյանը, Ռուբեն Մխիթարյանը, Արեգա Հովսեփյանը, Մամիկոն Ասլանյանը, Ավետիս Առաքելյանը, Մարիաննա Ղահրամանյանը, Հայկ Սուքիասյանը, Արգիշտի Դարբինյանը, Իրինա Յոլյանը, Էդգար Ղազարյանը, Տիգրան Աբրահամյանը, Լենա Մաթևոսյանը, Անդրանիկ Գևորգյանը, Հայկ Ֆարմանյանը, Լիլյա Շուշանյանը, Գրիշա Թամրազյանը, Արթուր Դանիելյանը, Լիաննա Գասպարյանը, Վաղինակ Վարդանովը, Գառնիկ Դավթյանը, Լիաննա Մանուկյանը, Հարություն Մնացականյանը, Վրույր Այվազյանը, Սյուզաննա Ավետիսյանը, Հարություն Հարությունյանը, Շիրազ Մանուկյանը և Անուշ Միրզոյանը։
Կուսակցության ներկայացուցիչ Գոհար Մելոյանը տեղեկացրել է, որ «Ուժեղ Հայաստանը» խորհրդարանական ընտրություններին նախատեսում է մասնակցել նույնանուն դաշինքի ձևաչափով, թեև միավորման վերջնական անվանումը դեռևս հաստատված չէ։
Նա հիշեցրել է, որ կողմերն ավելի վաղ ազդարարել էին «Ուժեղ Հայաստան Սամվել Կարապետյանի հետ» դաշինքի ստեղծման մասին, սակայն ապրիլի 7-ին Ազգային ժողովի ընդունած օրենսդրական փոփոխություններից հետո, որոնք արգելում են անձնանունների կիրառումը քաղաքական ուժերի անվանումներում, կուսակցությունը պարզաբանում ստանալու նպատակով դիմել էր ԿԸՀ։
Մելոյանի խոսքով՝ կուսակցությունը կարող էր դիմել Վարչական դատարան, սակայն այս պահին պարզաբանումներ ստանալու նպատակով դիմել է ԿԸՀ՝ նշելով, որ դաշինքի վերջնական անվանման հարցը Կենտրոնական ընտրական հանձնաժողովում դեռևս վերջնականապես հաստատված չէ։
Այսօր ավելի վաղ «Ուժեղ Հայաստան» և «Ապրելու երկիր» կուսակցություններն ընտրություններին դաշինքով միասնական մասնակցելու հուշագիր էին ստորագրել։
«Տաշիր» ընկերությունների խմբի ղեկավար Սամվել Կարապետյանի առաջնորդած «Ուժեղ Հայաստանը» մարտի 31-ին նախընտրական դաշինքի ստեղծման հուշագիր էր ստորագրել «Նոր դարաշրջան» և «Միավորված հայեր» կուսակցությունների հետ։ Կարապետյանի ուժին սատարելու մասին հայտարարել էին Հայաստանի ժողովրդավարական ազատական միությունը, ինչպես նաև «Կայունություն», «Ազատություն» և «Ժառանգություն» կուսակցությունները:
