«Ուժեղ Հայաստան» կուսակցությունն ապրիլի 11-ին հանրահավաք և երթ է իրականացրել Երևանում։ Ուղիղ հեռարձակումը՝ Armenia Today-ի YouTube-յան ալիքով։
«Ազատության» հրապարակում տեղի ունեցած հանրահավաքի մասնակիցներն անցել են Երևանի կենտրոնական փողոցներով, այդ թվում ՝ «Հանրապետության» հրապարակով՝ վանկարկելով «Սամվել վարչապետ», «փոփոխություն Սամվել Կարապետյանի հետ»։ Երթն ավարտվել է Կասկադում, ուր մասնակիցները բարձրացրել էին ՀՀ բազմամետրանոց դրոշը։
«Ազատության» հրապարակում, ուր տեղի էր ունեցել կուսակցության հանրահավաքը, կենտրոնացել էին ոստիկանության մեծաքանակ ուժեր։
Հանրահավաքը մեկնարկել է ՀՀ օրհերգով։ Ներկաները պաստառներ են բարձրացրել, որոնց վրա գրված էր՝ «Երիտասարդն է իր երկրի տերը», իսկ ոմանք պաստառների վրա նշել են հայրենի քաղաքների անունները։ «Սամվել վարչապետ» վանկարկումները հնչել են ամբողջ հանրահավաքի ընթացքում։
Հանրահավաքի ընթացքում կուսակցության առաջնորդ, «Տաշիր» ընկերությունների խմբի ղեկավար Սամվել Կարապետյանն անազատության 9 ամիսների ընթացքում առաջին անգամ հանդես է եկել տեսաուղերձով:
Ելույթի ընթացքում նա ընդգծել է, որ «Ուժեղ Հայաստան» կուսակցությանն առաջիկա խորհրդարանական ընտրություններում անհրաժեշտ է միանշանակ և մեծ հաղթանակ, որպեսզի ավելի արագ իրականացնի տնտեսության զարգացման, աղքատության վերացման և անվտանգության բարձրացման իր մեծ ծրագրերը:
Նա նաև նշել է, որ իր ղեկավարած ուժը կերտելու է երկիր, որտեղ կառավարիչները չեն դատարկում բյուջեն ու լցնում գրպանները։ Կարապետյանի խոսքով՝ հմուտ դիվանագիտության և հզոր տնտեսության շնորհիվ հնարավոր կլինի կառուցել անվտանգ ու բարգավաճ երկիր։ Նրա խոսքով՝ նոր գործարանների հիմնումն ու 300 000 նոր աշխատատեղի ստեղծումը կդառնան այն հիմքը, որը թույլ կտա ունենալ պաշտպանված երկինք և պրոֆեսիոնալ վերազինված բանակ։
«Այսօրվա աշխարհում ուժեղ տնտեսությունն է ուժեղացնում դիվանագիտությունը և պաշտպանությունը, և մենք կունենանք ուժեղ դիվանագիտություն և ուժեղ պաշտպանություն՝ պաշտպանված երկնքով, պրոֆեսիոնալ վերազինված բանակով»,- շեշտել է նա։
Քաղաքական գործիչն ընդգծել է, որ իրենք «թույլ խաղաղությունը» փոխարինելու են «ուժեղ խաղաղությամբ», և Հայաստանի ձայնը լսելի է լինելու Մոսկվայում, Վաշինգտոնում, Լոնդոնում ու Պեկինում։
Կարապետյանը նաև ընդգծել է, որ Հայաստանը կարող է և կլինի ուժեղ, և ընտրություններում իր հաղթանակի դեպքում իրական և երկարաժամկետ խաղաղություն ձեռք կբերվի: Նա տեղեկացրել է, որ իր ընկերության կառավարումը փոխանցում է իր երեխաներին, իսկ ինքը կծառայի իր երկրին։
«Ուժեղ Հայաստան» կուսակցության խորհրդի անդամ Նարեկ Կարապետյանը հանրահավաքի իր ելույթում հայտարարել է Հայաստանում ընտանիքների նկատմամբ վերաբերմունքի փոփոխության անհրաժեշտության մասին։ Նա նշել է, որ աղքատութան վերացման իրենց ծրագրերի շնորհիվ նրանք կդադարեն ընտրությունից ընտրություն փշրանքներ ստանալ պետությունից։
«Աղքատությանը վերջ դնելու համար Հայաստան են հոսելու միլիարդավոր դոլաների իրական ներդրումներ՝ իրական ներդրողներից։ Հայ մարդն աշխատելու է և լավ է ապրելու»,- հավելել է Կարապետյանը։
Կարապետյանն ընդգծել է, որ մարդիկ կանգնած են ընտրության առաջ՝ «փոփոխություն Սամվել Կարապետյանի հետ» կամ «լճացում, աղքատություն, անարգանք իրար հանդեպ և վախ՝ հարևաններից»՝ ներկայիս վարչապետ Նիկոլ Փաշինյանի օրոք։ Կուսակցության խորհրդի անդամը շեշտել է, որ փոփոխություններ հնարավոր են միայն Կարապետյանի հետ։
«10 ամիս առաջ այն օրը, երբ Սամվել Կարապետյանի հետ այցելեցինք Էջմիածնի Մայր տաճար, ենթադրել անգամ չէի կարող, որ այսօր կարող ենք այստեղ միասին տասնյակ հազարավոր մեր հայրենակիցների հետ լինել և ազդարարել երկրում շրջադարձային փոփոխությունների սկիզբը։ Մեզ առաջնորդել է նախախնամությունը, և մենք ենթարկվելով նրան՝ արել ենք և անում ենք ամեն ինչ, որպեսզի բերենք այդ փոփոխությունը, որը մեզ այդքան պետք է»,- ասել է նա։
Կարապետյանը հավելել է, որ փոփոխություն է պետք երկրում տիրող մթնոլորտում, առողջության, կրթության ոլորտում։ Նա շեշտել է, որ վիրավորանքը և արժանապատվություն ոտնահարելը թե՛ համացանցում, թե՛ համացանցից դուրս պետք է վերանան։ Առողջությունը, Կարապետյանի խոսքով, նախընտրական նվեր չէ։ Նա վստահություն է հայտնել, որ ներդրումների արդյունքում եկած հարկերից հնարավոր կլինի թույլ տալ մասսայական առողջության ապահովագրություն։
«Մեր դրոշը մեր ձեռքերում է, մեր Արարատը՝ մեր սրտերում»,- եզրափակել է Նարեկ Կարապետյանը։
Կարապետյանի կուսակցությունը մարտի 31-ին դաշինք ստեղծելու հուշագիր էր ստորագրել «Նոր դարաշրջան» և «Միավորված հայեր» կուսակցության հետ։
Կարապետյանի ուժին սատարելու մասին հայտարարել էին Հայաստանի ժողովրդավարական ազատական միությունը, ինչպես նաև «Կայունություն», «Ազատություն» և «Ժառանգություն» կուսակցությունները:
Հունիսի 7-ին կայանալիք ԱԺ ընտրություններին մասնակցելու հայտ են ներկայացրել մեկ տասնյակից ավելի քաղաքական ուժեր, այդ թվում՝ «Ուժեղ Հայաստան» կուսակցությունը, «Քաղաքացիական պայմանագիր» կուսակցությունը, «Միասնության թևեր» նախաձեռնությունը, Հայ ազգային կոնգրեսը (ՀԱԿ)։
Ընտրական քարտեզի մասին ավելին կարող եք իմանալ Armenia Today-ի տեսանյութում:
