«Ուժեղ Հայաստան» կուսակցության վարչապետի թեկնածու Սամվել Կարապետյանն իր ուղերձում հայտարարել է, որ ՀՀ իշխանությունների վարած քաղաքականության պատճառով երկիրը հետևողական քայլերով վերածվում է աշխարհաքաղաքական հակամարտության ասպարեզի։
Անդրադառնալով ապրիլի 1-ին Մոսկվայում ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի հանդիպմանը՝ Կարապետյանը շեշտել է, որ բարկացած է վարչապետի պահվածքից, որը, նրա համոզմամբ, խայտառակվել է Մոսկվայում։
Ըստ նրա՝ այս ընթացքի շարունակությունը կհանգեցնի տնտեսական ծանր հետևանքների և հասարակության ներսում լարվածության աճի։
Տնային կալանքի պայմաններում գտնվող «Տաշիր» ընկերությունների նախագահն ընդգծել է, որ Ռուսաստանի ներկայությունը տարածաշրջանում երբեք չի խանգարել այլ ուժային կենտրոնների հետ Հայաստանի համագործակցությանն ու առևտրին։ Կարապետյանի խոսքով՝ անհասկանալի է, թե ինչո՞ւ են իշխանությունները փորձում դուրս մղել ՌԴ-ն տարածաշրջանից։
«Ռուսաստանի հետ են մեր տնտեսական ամենախորը կապերը։ Ռուսաստանն է մեզ էժան գազ մատակարարում, սիրով ընդունում մեր սեզոնային աշխատողներին, գնում մեր գյուղատնտեսական ապրանքների զգալի մասը։ Իսկ եթե դադարեցնի այդ ամենը, ի՞նչ պատասխան եք տալու մեր ժողովրդին, որն ավելի կաղքատանա»,- նշել է Կարապետյանը։
Նրա խոսքով՝ այս կապերի թուլացումը կհանգեցնի բնակչության հետագա աղքատացմանը։ Նրա համոզմամբ՝ Փաշինյանին չի հետաքրքրում մարդկանց ճակատագիրը, գրպանի ու սառնարանի պարունակությունը։ Նրա նպատակը «սուտ պատերազմներով» վախեցնելով իշխանության մնալն է։
«Մենք տեսանք, թե ինչ պատահեց Վրաստանի և Ուկրաինայի հետ։ Մեզ նոր պատերազմներ պետք չեն»,- ասված է ուղերձում։
Նա զգուշացրել է, որ գործող իշխանության վերընտրվելու դեպքում հնարավոր է տնտեսական պատերազմ սկսվի ՌԴ-ի հետ։ Մինչդեռ իր ղեկավարած ուժի հաղթանակի դեպքում խոստանում է բարեկամական հարաբերություններ հաստատել տարածաշրջանի բոլոր երկրների և ուժային կենտրոնների հետ։
Կարապետյանը կոչ է արել ընտրողներին սատարել այլընտրանքային քաղաքական կուրսին՝ խոստանալով կառուցել ուժեղ տնտեսություն, միասնություն և երկարատև խաղաղություն։
ՌԴ փոխվարչապետ Ալեքսեյ Օվերչուկն ապրիլի 1-ին կայացած Փաշինյան-Պուտին հանդիպման հաջորդ օրը հայտարարել էր Հայաստանում ռուսական բիզնեսի համար առկա ռիսկերի, Երևանի հետ ապրանքաշրջանառության կրճատման և ԵԱՏՄ-ում արտահանման աճի մասին՝ մատնանշելով հայկական իշխանությունների հայտարարությունների և ռուսական ընկերությունների նկատմամբ փաստացի գործողությունների միջև առկա անհամապատասխանությունը։
