Կառավարությունն ապրիլի 2-ի նիստում մերժել է խորհրդարանում ներկայացված օրենքների փաթեթը, որը նախատեսում էր գումարի դիմաց զինվորական ծառայության ժամկետի կրճատում, զորակոչի տարիքը 27-ից 37-ի բարձրացում, ինչպես նաև քաղաքացիությունից դուրս գալու համար պետական տուրքի կտրուկ թանկացում՝ պատճառաբանելով, որ այս փոփոխությունները ժամանակավրեպ են, կարող են խրախուսել արտագաղթը և վատթարացնել ժողովրդագրական իրավիճակը:
Փաթեթով առաջարկվում էր մի քանի էական փոփոխություն՝ 18-27 տարեկան զինապարտ տղամարդկանց հնարավորություն տալ գումարի դիմաց կրճատված ժամկետով զինվորական ծառայություն անցնել: Մասնավորապես՝ 6 ամիս ծառայության դեպքում առաջարկվում էր վճարել 15 միլիոն դրամ, իսկ 1 ամսվա դեպքում՝ 20 միլիոն դրամ:
Կառավարությունը համարում է, որ այս առաջարկը ժամանակավրեպ է՝ հաշվի առնելով զինծառայության մասին օրենքում 2025 թվականի դեկտեմբերին արդեն իսկ կատարված փոփոխությունները:
Փաթեթով առաջարկվում էր պարտադիր զինվորական ծառայության զորակոչի առավելագույն տարիքը 27-ի փոխարեն սահմանել 37 տարեկան: Կառավարությունը գտնում է, որ նման քայլը կարող է բացասաբար անդրադառնալ ժողովրդագրական ցուցանիշների վրա, քանի որ այդ տարիքային խմբում տղամարդիկ սովորաբար ամուսնանում և ընտանիք են կազմում:
«Պետական տուրքի» մասին օրենքի նախագծով առաջարկվում էր մինչև 16 տարին լրանալը (զինվորական հաշվառման տարիքը) Հայաստանի քաղաքացիությունից դուրս գալու համար պետական տուրքը սահմանել 15 միլիոն դրամ: Կառավարությունը գտնում է, որ այս առաջարկը ևս խնդրահարույց է, և միայն զինծառայությամբ պայմանավորված՝ անհրաժեշտություն չի տեսնում պետտուրքի այդչափով բարձրացման համար։
Կառավարությունը 2025 թվականի մայիսին հավանություն էր տվել ԱԺ «Քաղաքացիական պայմանագրի» պատգամավոր Հայկ Սարգսյանի նախագծին, ըստ որի՝ ովքեր ցանկանում են ծառայել 24 ամսից քիչ, կարող են որոշակի գումար վճարել պետբյուջե։ Մեկ ամսվա ծառայության դեպքում վճարը կլինի 24 մլն դրամ (62,5 հազար դոլար), իսկ 4 ամսվա ծառայության համար՝ 18 մլն դրամ (46,8 հազար դոլար)։
Ապրիլի 6-ին ԱԺ պաշտպանության մշտական հանձնաժողովը մերժել է Սարգսյանի նախագիծը, կողմ է քվեարկել միայն Սարգսյանը։ Նախագիծը չի ընդգրկվել ԱԺ նիստերի օրակարգում։
Նիստում Սարգսյանը հայտարարել է, որ «գումարով բանակից ազատվելու» նախագծի վերաբերյալ պաշտպանության նախարար Սուրեն Պապիկյանի հետ ձեռք բերված պայմանավորվածությունը խախտվել է: Պատգամավորը նշել է, որ ինքը 2 տարի շարունակ Պաշտպանության նախարարի հետ քննարկել է այդ նախագիծը:
«Եկել ենք պայմանավորվածության, որ միայն ես եմ նախագիծը շրջանառելու: Քննարկումների արդյունքում կառավարությունը և Պաշտպանության նախարարությունը տվել են դրական եզրակացություն», - ընդգծել է Սարգսյանը:
Պատգամավորը հայտարարել է, որ դրանից հետո պայմանավորվածությունը խախտվել է։ Նրա խոսքով՝ մայիսին, երբ նախարարը դրական եզրակացություն է տվել իր նախագծին, կողմերը գիտեին, որ աշնանը նախարարը բերելու է ծառայության ժամկետի կրճատման նախագիծը:
«Ինձ չէին ասում՝ գիտե՞ս ինչ, մենք աշնանը ծառայության ժամկետը կրճատելու ենք, այս նախագիծը մի արա: Հակառակը՝ ասում էին՝ դու արա, սրա արդյունքում զինվորների թիվը կավելանա, մենք էլ ծառայության ժամկետը կրճատենք, որպեսզի միավոր ժամանակահատվածում զինվորների թվի պակաս չունենանք»,- նշել է պատգամավորը:
Թարմացված է՝ 06.04.2026 | 16:40
