Դատավոր Գևորգ Մանուկյանն ինքնաբացարկ է հայտնել Մայր Աթոռի դիվանապետ, արքեպիսկոպոս Արշակ Խաչատրյանի գործով՝ բավարարելով պաշտպանության միջնորդությունը: Դատարանը նաև հաստատել է, որ արքեպիսկոպոսի գործի նյութական ապացույցները կորել են:
Նշվել է, որ մարիխուանայի գլանակը կորել է Արմավիրի քննչականում բաժնում: Այս փաստի առթիվ հարուցվել է քրեական գործ պաշտոնեական անփութության հոդվածով: Արքեպիսկոպոսի փաստաբանները կասկածներ են հայտնել գործի հանգամանքների շուրջ:
Փաստաբան Երեմ Սարգսյանը նշել է, որ Գևորգ Մանուկյանը նախկինում աշխատել է Արմավիրի քննչականում: Ըստ նրա՝ այս պահին չկան օբյեկտիվ տվյալներ նրա կաշկանդվածության վերաբերյալ, սակայն հետագայում դա չի բացառվում։
Արշակ սրբազանը դատական նիստից հետո լրագրողներին հայտնել է, որ քրեական հետապնդումը կապված է «Հայ Առաքելական եկեղեցու դեմ արշավի» հետ:
«Գործը հարուցվել է 2018 թվականին, այնուհետև՝ փակվել, իսկ 2025 թվականին՝ վերաբացվել, և ես դարձել եմ մեղադրյալ»,- նշել է նա:
Մեկնաբանելով մեղադրանքները՝ արքեպիսկոպոսը հավելել է. «Ես չգիտեմ՝ սա ինչի մասին է պատմում, բայց ծիծաղելի է»:
Խաչատրյանը կալանավորվել էր 2025 թվականի դեկտեմբերին: Իրավապահերը պնդում են, որ նա Ամենայն Հայոց կաթողիկոս Գարեգին Երկրորդի հրաժարականը պահանջող «Նոր Հայաստան, Նոր Հայրապետ» շարժման ակցիայի ժամանակ դիվանատան ընդունարանում կախված պայուսակի մեջ թմրամիջոց գցելու ցուցում էր տվել:
Արքեպիսկոպոսը կալանքից ազատ էր արձակվել մարտի 5-ին՝ Վերաքննիչ դատարանի որոշմամբ: Դատարանը որոշակի սահմանափակումներ էր սահմանել, այդ թվում՝ Վաղարշապատը լքելու և վկաների հետ շփվելու արգելք:
